Toshkentda ikki kun ichida sodir bo‘lgan 4 ta YTHda 1 kishi vafot etdi, 4 nafari jarohatlandi

Toshkent shahrida 24–25-noyabr kunlari 4 ta yo‘l-transport hodisasi sodir bo‘lgani xabar qilindi. YTHlar tafsilotini quyida taqdim etamiz.

Sergelida Matiz piyodani urib yubordi

2021-yil 24-noyabr kuni taxminan soat 00:40 da Sergeli tumani Toshkent halqa avtomobil yo‘lida Matiz avtomobilini ishonchnoma asosida boshqargan 1998-yilda tug‘ilgan D.I. yo‘lni belgilanmagan joydan kesib o‘tayotgan piyodani urib yuborgan.

YTH oqibatida piyoda – 1982-yilda tug‘ilgan K.Sh. tan jarohatlari bilan shifoxonaga yetkazildi, ammo shifokorlarning sa’y-harakatlariga qaramasdan, hayotdan ko‘z yumgan.

Mazkur fakt asosida Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bo‘yicha jinoyat ishi qo‘zg‘atildi. Tergov davom etmoqda.

Yunusobodda Spark bilan to‘qnashgan Matiz ag‘darilib ketdi

2021-yil 24-noyabr kuni soat 13:30 larda, Toshkent shahar, Yunusobod tumani, Ahmad Donish ko‘chasida joylashgan 22-uy ro‘parasida, haydovchi, 1985-yilda tug‘ilgan A.S. boshqaruvidagi Matiz hamda haydovchi, 1989-yilda tug‘ilgan N.A. boshqaruvida bo‘lgan Spark avtomobillari ishtirokida to‘qnashuv sodir bo‘lgan va Matiz avtomobili ag‘darilgan.

YTH natijasida tan jarohati olgan fuqarolar yo‘q.

Holat yuzasidan Toshkent shahar IIBB YHXB xodimlari tomonidan surishtiruv olib borilmoqda.

Bektemirda “KamAZ” olib ketayotgan beton ustunlar kabinaga zarar yetkazdi

2021-yil 25-noyabr kuni soat 07:30 larda, Toshkent shahar, Bektemir tumani hududidan o‘tgan Sergeli–Bo‘stonliq avtomobil yo‘lining 18-kilometrida, haydovchi, 1995-yilda tug‘ilgan O.T. “KamAZ”da harakatlanayotib keskin tormoz berishi oqibatida, yukxonada bo‘lgan beton ustunlar joyidan oldinga siljib, avtomobilning kabina qismiga zarar yetkazgan.

Oqibatda haydovchi O.T. yengil tan jarohati bilan shifoxonaga murojaat qilgan. Hozirda haydovchi hodisa joyida, ahvoli yaxshi.

Mazkur YTH yuzasidan Toshkent shahar IIBB YHXB xodimlari tomonidan surishtiruv olib borilmoqda.

Shayxontohurda Spark va Lacetti to‘qnashdi

2021-yil 25-noyabr kuni soat 07:00 larda, Toshkent shahar, Shayxontohur tumani, Nurafshon ko‘chasida haydovchi, 1991-yilda tug‘ilgan Q.Q. boshqaruvidagi Spark hamda haydovchi, 1995-yilda tug‘ilgan F.I. boshqaruvida bo‘lgan Lacetti avtomobillari ishtirokida to‘qnashuv sodir bo‘lgan.

Oqibatda Spark haydovchisi va Lacetti salonida bo‘lgan bir nafar yo‘lovchi tan jarohati bilan shifoxonaga olib ketilgan.

Mazkur YTH yuzasidan Toshkent shahar IIBB YHXB xodimlari tomonidan surishtiruv olib borilmoqda.