Тошкентнинг Қорасарой кўчасидаги ушбу спорт мажмуасидан 2017 йили футзал бўйича эшитиш имконияти чекланган (ЭИЧ) ва заиф эшитувчи жамоалар ўртасидаги U-18 жаҳон чемпионати ғолиблари етишиб чиққан. Аммо неча йилдирки, спортчилар бу ерда машғулот ўтказолмайди — мажмуа яроқсиз аҳволда.
Ўзбекистон карлар жамияти аъзоси Маъмур Аҳлиддинов «Дарё»га берган интервьюсида мажмуа реконструкцияси бўйича қатор ташкилотларга мурожаат қилгани, аммо натижа бўлмаётганини таъкидлаган эди. Аҳволни ўрганиш мақсадида «Дарё» мухбири мажмуада бўлди.
Мажмуага кираверишда турган курак ва бошқа асбоблар ободонлаштириш бўлими ходимлариники — бизга ҳамроҳлик қилган (ва шахси ошкор этилишини истамаган) спорт мураббийининг айтишича, улар яқин ҳудудларда ишлагач, «бўш турган жой» деб буюмларини мажмуага ташлаб кетади. Лекин бу мажмуани ҳам обод қилиш ҳақида бирор масъул ўйлаб кўрмайди.
Бир вақтлар бутун собиқ Иттифоқдан келиб Тошкентда ўқиган ЭИЧлар учун спорт майдончаси ҳисобланган мажмуанинг деворлари бугун нураган, рангсиз, шифт ва ромлари қават-қават, бир неча йиллик исларга тўла; полни босганда чанг эмас, биратўла тупроқни ҳис қиласан, спорт билан шуғулланиш ва спорт буюмларини сақлаш учун мўлжалланган хоналар эса чанг-тўзонли чиқиндихоналарга айланган.
Ювиниш хоналаридаги иситиш тизимлари ишдан чиққан, қувурлар занглаган (баъзи жойларда қувур бор-у, масалан, раковина йўқ), ҳожатхоналар яроқсиз. Қизиқ, бу ерда шуғулланувчилар (агар улар ҳали ҳам бўлса) табиий эҳтиёжларини қаерда, қандай қондиради? «Ҳеч қаерда, — дейди бизга ҳамроҳ мураббий. — Футболчиларимиз шахматчилар хонасида кийим алмаштиради, бошқа заруратлар учун шароит йўқ».
Ўт ўчириш ускуналари сақланадиган хона ёғоч бўлаги билан тамбаланган, пештоқдаги ранглари ўчиб кетган, бир уринишда ўқиб бўлмайдиган: «Дарахтни ширин мева, устозни эса оқил шогирд безайди», деган мақолсифат ёзув бу ташландиқ муҳитда жуда рамзий кўринади. Яқин ўтмишда бир қанча ромлар «акфа»ларга алмаштирилган, лекин иш чала қилинган — янги ром остидаги тешиклар ҳар шамол бўлганда зални қуриган баргларга тўлдиради.
Мажмуа деворларда Фабен Бартез, Майкл Оуэн каби бундан 15—20 йил аввал жаҳон даражасида юлдуз ҳисобланган футболчиларнинг портретларини кўриб қоласиз — мажмуа охирги марта қачон фойдаланишга яроқлироқ бўлган-у, спортга қизиқувчи имконияти чекланган шахслар билан тўла бўлганини шундан ҳам тахминан ҳисоблаб олаверса бўлади (дарвоқе, ўша вақтларда бу ерда шуғулланган ЭИЧ спортчилар кўплаб мусобақаларда чемпион ҳам бўлган).
Ҳамроҳимизнинг таъкидлашича, мажмуада волейбол, баскетбол, футзал каби спорт турлари билан шуғулланиш мумкин (эди). «Волейболчи қизлар жамоаси бўларди, шу ерда машғулот олиб борарди. Бино яроқсиз ҳолга келгач, жамоа тарқалиб кетди», — дейди суҳбатдош. Кейинчалик шахматчилар, таэквондочилар ва бошқа спортчилар ҳам бу ердан кетган (шунчаки мажмуадан кетса майлига эди — спортдан ҳам кетиб, меҳнат муҳожирига айланганлар қанча).
Мажмуа қачон таъмирланади?
Президент Шавкат Мирзиёев 2018 йил июнида Ўзбекистон Карлар жамиятининг Кар-соқовлар маданият марказида меҳмон бўлганди. Ўшанда расмий ахборотларда «450 ўринли концерт зали, тўгарак хоналари, спорт заллари таъмирланиб, замонавий жиҳозлангани» таъкидланган эди. Қолган иншоотлар эҳтимол тўлиқ таъмирлангандир, аммо спорт мажмуасининг таъмири фасад ва томдан ичкарига ўта олмаган. Буни Ўзбекистон Карлар жамияти раиси Гўзал Шодиева «Дарё» мухбири билан суҳбатда ҳам тасдиқлади (шу билан бирга, у «мажмуанинг реконструкция қилинмай келаётганига Карлар жамияти раиси сифатида бирор дахли йўқ»лигини ҳам таъкидлади).
Шодиева хонимнинг сўзларига кўра, президент ташрифи арафасида Карлар маданият марказидаги барча мажмуаларни 10 кун ичида таъмирлаш ҳақида топшириқ берилган ва бу вақт ичида спорт мажмуасининг фақат том ва фасад қисминигина таъмирлашга улгурилган. Олий ташриф, биринчи галда, маданият марказига бўлган эди, спорт мажмуасини эса кейинроқ ҳам таъмирлаб олса бўлади — шундай ваъдалар бир неча бор берилган. Масалан, 2019 йил сентябрида Ўзбекистон Карлар жамиятининг 90 йиллигига бағишланган тадбирда Олмазор туманининг ўша вақтдаги ҳокими Бахтиёр Раҳмонов «марказдаги барча бинолар таъмирланади», деб айтган.
Аммо Раҳмонов ваъдасини бажаришга улгурмай, Тошкент шаҳар ҳокимининг биринчи ўринбосари бўлиб «кўтарилиб» кетган. Гўзал Шодиеванинг таъкидлашича, 2021 йил январида Олмазорга ҳоким этиб тайинланган Абдумажид Муллажонов реконструкция учун 3 миллиард сўм пул ажратган, аммо ишлар бошланиб-бошланмай, 51 ёшли ҳоким июль ойида вафот этди. Олмазорнинг янги ҳокими Азизхон Умархонов эса Шодиева хоним билан сентябрь ойида бўлиб ўтган суҳбатда «ҳокимликда янгилиги учун ҳали бу муаммодан бехабарлиги, вазиятни ўрганиб, келгуси йили таъмирлаб бериш»ни ваъда қилган.
Айни вақтда, Олмазор тумани ҳокимлиги матбуот хизмати мажмуалар таъмири учун Муллажонов даврида 3 миллиард сўм ажратилганидан ҳам, ҳоким Умархонов биноларни «келгуси йилда таъмирлаб бериш»ни айтганида ҳам бехабар (ҳар ҳолда, ҳокимлик ахборотини бошқача тушуниб бўлмайди). «Реконструкция қилиш ҳамда жиҳозлаш учун талаб этилаётган маблағларни молиялаштириш учун иш олиб борилмоқда. Молиялаштириш манбалари аниқлангандан сўнг, бу бўйича тегишли маълумот берамиз» — дейилади ҳокимлик матбуот хизматининг «Дарё»га тақдим этилган жавобида. Ҳақиқат қаердадир мана шу баёнотлар орасида бўлиши керак.
Мулоҳаза шуки, ҳар турли ярим-давлат уюшмаю ташкилотлар давлат ҳисобидан қимматбаҳо автомобиллар олаётган, ҳар турли интеллектуал ва интеллектуал бўлмаган ҳаракату ташаббуслар бутун бошли янги ва замонавий бинолар эгасига айланаётган бир вақтда, ҳуқуқлари уларники билан тенг — президент Шавкат Мирзиёев сўзлари билан айтганда, «жамиятимизнинг муносиб аъзолари» бўлган эшитиш имконияти чекланганлар ҳар доимгидан бироз бўлса-да кўпроқ эътиборга лойиқроқ, токи улар «булар эшитмайди, гапиролмайди, деб бизнинг муаммоларимизга кўз юмишади, масъуллар биз билан боғлиқ масалаларда кўнгилларига келганини қилишади», деб ўйлашмасин.
Изоҳ (0)