Toshkent viloyati Oqqo‘rg‘on tumanida joylashgan mahallalarning birida er-xotin is gazidan zaharlanib, vafot etdi. Bu haqda Bosh prokuratura “Daryo”ga ma’lum qildi.
Ma’lum qilinishicha, 26-noyabr kuni tumanning “Sultonobod” mahallasida yashovchi fuqaro D.A. (1995-yilda tug‘ilgan) va uning turmush o‘rtog‘i S.A.ning (1997-yilda tug‘ilgan) murdasi tez tibbiy yordam xodimlari tomonidan tuman tibbiyot birlashmasiga is gazidan zaharlanish tashxisi bilan olib kelingan.
“Gazeta.uz”ning yozishicha, ular 2021-yilning avgust oyida oila qurgan bo‘lgan.
Tergov-tezkor guruhi tomonidan hodisa joyi ko‘zdan kechirilganda D.A. uyning yashash xonadoniga 25-noyabr kuni kechki vaqtda qo‘lbola usulda yasalgan tabiiy isituvchi pechni olib kelib qo‘ygani ma’lum bo‘lgan. Biroq isitish pechini o‘rnatmagan hamda dudbo‘ron qo‘ymagan.
Xonadonga gaz o‘tkazilishiga oid hamda qo‘lbola usulda yasalgan temir pech, 15 metrlik oq rangli rezina shlang va tejamkor yondirgich (“garelka”) ashyoviy dalil tariqasida olingan.
Sud-tibbiy ekspertizasining dastlabki ma’lumotnomasida fuqarolarning o‘limiga noma’lum etiologiyali zaharlanish, o‘tkir yurak-qon tomir nafas yetishmovchiligi, miya va o‘pkalar shishi sabab bo‘lgani ko‘rsatilgan.
Mazkur holat yuzasidan tuman prokuraturasi tomonidan tergovga qadar tekshiruv harakatlari olib borilmoqda.
Shuningdek, Oqqo‘rg‘on tumani hokimining qarori bilan mazkur baxtsiz hodisa sabablari maxsus ishchi guruh tomonidan o‘rganilmoqda.
Avvalroq Farg‘onadagi bog‘chadan erkak kishining jasadi topilgani, u is gazidan zaharlangan bo‘lishi mumkinligi, Nukusda ijarada yashovchi 18 yoshli talaba yigit is gazidan zaharlanib, vafot etgani, Samarqandda konteynerdan o‘lik holda topilgan ikki ishchi ham is gazidan zaharlanib, vafot etgani ma’lum qilingandi.
Izoh (0)