Nukusda ijarada yashovchi 18 yoshli talaba yigit is gazidan zaharlanib, vafot etdi. Xonadonda bo‘lgan yana 6 kishi omon qolgan

Nukusdagi ko‘pqavatli uylarning birida talaba yigit is gazidan zaharlanib, vafot etdi. Bu haqda Qoraqalpog‘iston Respublikasi prokuraturasi xabar berdi.

Ma’lum qilinishicha, 24-noyabr kuni soat 07:00 larda Nukus shahri, 22-kichik tumanidagi ko‘p qavatli uylardan birida ijarada yashovchi yigit R.R. xonadonda o‘rnatilgan isitish qozoni otashxonasidan sizib chiqqan is gazidan zaharlanib, vafot etgan.

Mazkur holat yuzasidan nisbatan sud-tibbiy ekspertizasi tayinlangan. Ayni paytda Nukus shahar prokuraturasi tomonidan tergovga qadar tekshirish harakatlari olib borilmoqda. Tekshirish harakatlari Qoraqalpog‘iston Respublikasi prokuraturasi tomonidan nazoratga olingan.

Bosh prokuratura axborot xizmati rahbari Hayot Shamsutdinovning “Daryo” so‘roviga asosan ma’lum qilishicha, marhum yigit 18 yoshda bo‘lib, Nukus Davlat pedagogika institutining fizika-matematika fakulteti 2-kurs talabasi bo‘lgan.

Tergovga qadar tekshirishda aniqlanishicha, hodisa sodir bo‘lgan xonadonda R.R.dan tashqari yana 6 kishi bo‘lgan. Marhum R.R. oshxonada uxlab, qolgan 6 kishi boshqa xonalarda bo‘lgan. Shu sababli R.R.dan tashqari ulardan hech biri is gazidan zaharlanmagan.

Eslatib o‘tamiz, Toshkentning Yunusobod tumanidagi uylarning birida ijarada yashovchi besh nafar talaba 27-fevral kuni is gazidan zaharlanib, vafot etgandi. Talabalar bilan qonuniy ijara shartnomasi tuzmay, ularni hayot uchun xavfli va texnika xavfsizligi qoidalariga rioya etilmagan uyiga ijaraga qo‘yib, ularning o‘limiga sababchi bo‘lgan ayolga 3 yil muddatga ozodlikni cheklash jazosi tayinlangandi.

Ushbu fojiadan so‘ng talabalarni yotoqxona bilan ta’minlash muammosi parlament darajasida muhokama qilindi, rektorlar ijarada yashaydigan talabalarning holidan xabar ola boshladi, fojiadan keyin bir qator universitetlar talabalar uchun mo‘ljallangan yangi turar joylarni foydalanishga topshirdi.