2021-yilning o‘tgan davrida ayollarga zo‘ravonlik va tazyiq o‘tkazgan 1 ming 629 nafar shaxsga nisbatan ayblov hukmlari chiqarilgan. Bu haqda 26-noyabr kuni o‘tkazilgan xalqaro konfrensiyada Oliy sud sudyasi Nodira Hakimova ma’lum qildi, deya xabar bermoqda “Daryo” muxbiri.
“Joriy yilning hisobot davrida ayollarga nisbatan zo‘ravonlik va tazyiq o‘tkazish bilan bog‘liq jami 2 ming 423 nafar shaxsga nisbatan 2 ming 12 ta jinoyat ishlari ko‘rilgan. Shundan, 1 ming 629 nafar zo‘ravonlik va tazyiq o‘tkazgan shaxslarga ayblov hukmlari chiqarilgan. Bu 67 foizni tashkil etgan.
Bunday jinoyatlarni sodir etgani uchun shaxslarning sudlanish ko‘rsatkichi hududlar kesimida tahlil qilindi. Zo‘ravonlarning aksariyati Toshkent, Farg‘ona, Samarqand viloyatlari va Toshkent shahrida yashayotgani ma’lum bo‘ldi.
Jabrlangan ayollar ham aynan shu hududlarda ko‘pchilikni tashkil etmoqda. 2 ming 300 nafar jabrlangan xotin-qizlarning 353 nafari Toshkent viloyatida, 393 nafari Samarqand viloyatida, 228 nafari Toshkent shahrida istiqomat qilishi aniqlandi.
Bu ayollarning moddiy tomonlama mustaqillik jihati o‘rganilganda, ya’ni jabr ko‘rgan xotin-qizlarning 1 ming 976 nafari yoki 86 foizi ishsiz ekani oydinlashdi. Moddiy qiyinchilik ko‘pincha oilaviy nizolarning sababchisi bo‘lmoqda. Shu bois erkaklar ojiza ayollarga qo‘l ko‘tarib, zo‘ravonlik qilyapti”, — dedi Oliy sud vakili.
Hakimovaning qayd etishicha, bu kabi ishlarning muayyaan qismi yarashtiruv bilan tugamoqda, ya’ni oilalar saqlanib qolinmoqda. 2021-yilning o‘n oyida 492 ta oila yarashtirilgan.
Mavzuga doir:
- “Ayollarga nisbatan har qanday zo‘ravonlik ildizini quritish yo‘lidagi kurashda sizning oldingizda bo‘laman” — Saida Mirziyoyeva
- “Mahalla vakillariga ‘agar turmush o‘rtog‘i haqiqatan zo‘ravon bo‘lsa, bunday oilalarni yarashtirishga harakat qilmanglar’, deb aytilyapti” — senator
- O‘zbekistonda gender zo‘ravonlikka qarshi 16 kunlik faol harakatlar kampaniyasi e’lon qilindi
Izoh (0)