Тараққиётнинг истиқболли босқичига ўтаётган янги Ўзбекистонда кенг кўламли ислоҳотлар қаторида миллий иқтисодиётимизнинг муҳим қувват манбаи ҳисобланган гидроэнергетика тармоғи ҳам изчил ривожланмоқда.
Мамлакатимиз гидроэнергетика соҳаси тараққиётида «Ўзбекгидроэнерго» акциядорлик жамиятининг тизим ташкилоти ҳисобланган «Гидропроект» акциядорлик жамиятининг муҳим ўрни бор.
«Гидропроект» АЖ Ўзбекистон Республикасининг гидротехника ва гидроэнергетика иншоотларини лойиҳалаш, уларнинг қурилишини қўллаб-қувватлаш соҳасидаги бош ташкилот ҳисобланади.
«Гидропроект» АЖнинг асосий фаолият турларига гидротехник лойиҳалаштириш ва қуриш, гидроэнергетик, гидротехник объектларни комплекс лойиҳалаштириш, юқори хавфли объектлар ва потенциал хавфли саноат тармоқларида лойиҳа-қидирув ва тажриба-лаборатор ишларини комплекс амалга ошириш киради.
Бугун, 26 ноябрь куни «Гидропроект» акциядорлик жамиятининг 90 йиллигига бағишланган тадбир бўлиб ўтди.
Ушбу тантанали маросим «Гидропроект» АЖ маъмурий биносининг мажлислар залида ташкил этилди. Тадбирда Олий Мажлис палаталари аъзолари, давлат идора ва муассасалари, ҳамкор хорижий ташкилотлар вакиллари, «Ўзбекгидроэнерго» АЖ ва тизим корхона ҳамда ташкилотлари, «Гидропроект» АЖ раҳбарияти ва мутахассислари, телевидение ва радио, босма ва электрон ОАВ вакиллари ҳамда журналистлар иштирок этишди.
Тадбирда сўзга чиққан мартабали меҳмонлар, фахрий ва тажрибали мутахассислар томонидан «Гидропроект» АЖнинг Ўзбекистон тарихидаги ўрни, мамлакатнинг ижтимоий-иқтисодий ривожланиши учун муҳим ўрин тутган энергетика, хусусан, гидроэнергетика объектларини ҳар томонлама пухта ва сифатли тарзда лойиҳалаштиришдаги ўрни ва аҳамияти борасида фикр-мулоҳаза билдирилди, АЖ раҳбарияти ва жамоасига 90 йиллик юбилей муносабати билан самимий тилаклар ва эзгу табриклар йўлланди. Шу билан бирга, ташкилотнинг келгуси фаолиятида улкан марралар, залворли ютуқ ва муваффақиятларни забт этишига умид билдирилди.
Ташкилот тарихига назар солсак, 1931 йил март ойида Биринчи Ўрта Осиё энергетика қурултойида Ўрта Осиё республикаларининг электрификация бош режасининг қабул қилиниши «Гидропроект» институтининг ташкил этилишига туртки берди.
Институт (ҳозирда «Гидропроект» АЖ) узоқ йиллар мобайнида нафақат Ўзбекистон, балки Марказий Осиё ва хорижий мамлакатлар учун муҳим гидроэнергетик лойиҳаларни амалга оширди. Шунингдек, ташкилот фаолиятининг асосий йўналишлари бўйича, хусусан, гидротехник лойиҳалаштириш ва қуриш, гидроэнергетик, гидротехник объектларни комплекс лойиҳалаштириш, юқори хавфли объектлар, потенциал хавфли саноат тармоқларида лойиҳа-қидирув ва тажриба-лаборатор ишлари тажрибали, малакали мутахассислар томонидан бажарилди.
Бугунги кунда Ўзбекистон Республикаси Президентининг 2017 йил 18 майдаги ПФ 5044-сон фармони асосида «Гидропроект» АЖ «Ўзбекгидроэнерго» АЖнинг ташкилий тузилмаси таркибига кирди ва самарали фаолият юритмоқда.
Тантанали тадбирда «Гидропроект» АЖнинг 90 йиллик юбилейига бағишланган махсус журнал ҳамда логотип ребрендинги тақдимоти, ташкилот фаолиятини ўзида акс эттирган корпоратив услуб ва видеороликлар тақдимоти бўлиб ўтди. Жумладан, 2021 йил 13—14 ноябрь кунлари «Гидропроект» АЖ ходимлари томонидан олис «Кунгурбук» чўққисининг забт этилганлиги ҳақидаги видеоролик намойиш қилинди. «Гидропроект» АЖ расмий веб-сайтининг янги версияси ва институтнинг 90 йиллигига бағишланган веб-сайт тақдимоти ўтказилди. Шу билан соҳада самарали фаолият юритган бир гуруҳ ходимлар «Гидроэнергетика ифтихори» кўкрак нишони билан тақдирланди.
Шунингдек, тадбирнинг тантанали қисми доирасида «Гидропроект» АЖ ҳамда бир қатор ташкилотлар ўртасида ҳамкорлик меморандумлари имзоланди.
Таъкидлаш жоизки, тантанали тадбир доирасида пойтахтимиз марказидаги «Дўстлик» истироҳат боғида «Гидроэнергетиклар хиёбони»нинг тантанали очилиш маросимига бағишланган байрам тадбири ташкил этилди. Хиёбон барпо этилиши жорий йилнинг 20 ноябрь куни Ўзбекистон Республикаси Президенти ташаббуси билан амалга оширилаётган «Яшил макон» умуммиллий лойиҳаси доирасида бўлиб ўтди. Хиёбон ҳудудига «Гидропроект» АЖ Ўзбекистон Экологик партияси билан ҳамкорликда 150 тупдан ортиқ манзарали дарахт кўчатлари экилди.
Алоҳида таъкидлаш лозимки, «Гидропроект» АЖ ўзининг 90 йиллик фаолияти давомида нафақат мамлакатимизда, балки Марказий Осиё республикалари ва бошқа давлатлар (хусусан, Қирғизистон, Тожикистон, Қозоғистон, Туркманистон, Афғонистон, Ветнамда 37 та ГЭС)да қурилган ва модернизация қилинган 100 дан ортиқ ГЭСларни (умумий ўрнатилган қуввати 10 ГВт дан ортиқ) лойиҳалаштирган.
Ҳозирги кунда, 2021 йил ҳолатига «Гидропроект» АЖ томонидан умумий ўрнатилган қуввати 757,0 МВт бўлган 11 та ГЭСни лойиҳалаш ва қурилишини таъминлаш устида ишланмоқда.
Реклама ҳуқуқи асосида.
Изоҳ (0)