Lukoil tomonidan O‘zbekistonda 2004-yildan buyon amalga oshirilayotgan loyihalar natijasida qazib olingan tabiiy gaz hajmi 100 milliard kubometrga yetdi.
Mazkur ko‘rsatkich Lukoil Uzbekistan Operating Company MChJ tomonidan qo‘lga kiritilgan yutuqlar orasida shunisi bilan ahamiyatliki, unga OAJ Lukoil’ning (Rossiya) 30 yillik yubileyi arafasida erishildi.
Lukoil O‘zbekiston mahsulot taqsimlash to‘g‘risidagi ikkita bitim (MTTB) doirasidagi loyihalarni amalga oshiradi, shu jumladan, “Qandim” konlar guruhi tarkibidagi “Xauzak” va “Shodi” konlari, shuningdek, uni o‘zlashtirish uchun salmoqli moliyaviy xarajatlar talab qilinadigan Janubi-Sharqiy Hisor hududlaridagi konlarda ish olib borildi. Bugungi kunga kelib, loyihalarni amalga oshirish uchun Lukoil tomonidan kiritilgan investitsiya summasi 8 milliard dollar atrofini tashkil qiladi. Kompaniya O‘zbekiston Respublikasidagi eng yirik xorijiy investor hisoblanadi.
Lukoil’ga MTTBda ko‘zda tutilgan muddatga berilgan konlar aslida Sovet davrida aniqlangan bo‘lib, sharoitlarning murakkabligi va yirik moliyaviy xarajatlar talab etilishi sababli o‘zlashtirilmagan edi.
2004-yilning noyabr oyida O‘zbekiston hukumati tomonidan MTTB imzolanishi O‘zbekiston Respublikasi va Rossiyaning Lukoil neft-gaz kompaniyasi o‘rtasidagi o‘zaro manfaatli hamkorlikka asos soldi.
Qazib olingan tabiiy boyliklarning asosiy qismi (70 foizdan yuqori) Buxoro viloyatining “Qandim—Xauzak—Shodi” konlariga to‘g‘ri keladi.
Ushbu konlar 1967-yilda aniqlangan bo‘lishiga qaramay, oltingugurt miqdori yuqori bo‘lgan gazni qazib olish va tozalash uchun mablag‘ yetishmasligi hamda ishlab chiqarish jarayonining murakkabligi sababli konservatsiya qilingan edi. Lukoil’ning respublikaga kirib kelishi tufayli “Xauzak—Shodi” konlari o‘zlashtirildi va 2008-yilda uning loyihaviy quvvati yiliga 4 milliard kub metr gaz qazib chiqarish darajasiga yetdi.
2017-yilda Qandim gazni qayta ishlash kompleksi foydalanishga topshirildi va obyekt 2019-yilda loyihaviy quvvati yiliga 8,1 milliard kub metr “zangori olov” yetkazib berish darajasiga yetdi.
Janubi-G‘arbiy Hisor hududlari va O‘zbekiston Respublikasining Ustyurt mintaqasi konlari bo‘yicha mahsulot taqsimlash to‘g‘risidagi bitim 2007-yilning aprelida kuchga kirdi.
“Janubi-G‘arbiy Hisor” loyihasiga Lukoil 2008-yilning mart oyida kirishdi, 2009-yilning aprelida esa Lukoil Uzbekistan Operating Company kompaniyasi Qashqadaryo viloyatidagi Hisor konlar guruhini o‘zlashtira boshladi.
Gaz qazib olishga 2011-yilning dekabrida kirishildi. “Gumbuloq” va “Odamtosh” konlaridagi asosiy ishlab chiqarish va texnologik obyektlar 2017-yilda ishga tushirildi — “Odamtosh”da gazni dastlabki tayyorlash uskunasi (GDTU) ishga tushirildi, shuningdek, yiliga 1,8 milliard kub metr loyihaviy quvvatga ega bo‘lgan siquv-kompressor stansiyasi (SKS) qurilishi yakunlandi. 2018-yilga kelib, gaz qazib olish hajmi loyihada ko‘zda tutilgan darajaga, ya’ni yiliga 5 milliard kub metrga yetkazildi.
Bugungi kun kelib, Lukoil’ning O‘zbekiston Respublikasidagi barcha loyihalari bo‘yicha to‘plangan tabiiy gaz miqdori 100 milliard kub metrga yetdi.
Shuni ta’kidlab o‘tish kerakki, o‘z faoliyatini O‘zbekiston Respublikasida olib borayotgan Lukoil Uzbekistan Operating Company MChJ quduqlarni qazib olish, o‘rnatish va jihozlash, tabbiy gazni tozalash, qayta ishlash va mahsulot ko‘rinishiga keltirish bilan shug‘ullanadigan loyihalar operatori hisoblanadi.
Tabiiy gazni qazib chiqarish, tozalash va “zangori yoqilg‘i” darajasida qayta ishlash qimmat turuvchi yuqori texnologik va murakkab jarayon hisoblanadi. Lukoil obyektlarida amalga oshiriladigan gazni kompleks tayyorlash va qayta ishlash sifatning yuqori standartlari asosida olib boriladi, yakuniy mahsulot esa ichki va xalqaro bozorlarda talabgirdir. 100 milliard kub metr gaz qazib chiqarish — mamlakatimizning xorijiy investor bilan uzoq muddatli o‘zaro manfaatli hamkorligini ifodalovchi muhim ko‘rsatkichdir.
O‘zbekiston Respublikasining Lukoil tomonidan qazib chiqarilgan tabiiy gazning xalqaro bozorlardagi sotuvidan olgan umumiy daromadi 4 milliard dollardan ziyodni tashkil etadi.
Reklama huquqi asosida.
Izoh (0)