Shavkat Mirziyoyev: “Har bir viloyat hokimi eshitsin, pul tayyor turibdi. Endi uni aql bilan ishlatishni o‘rganish kerak”

Prezident Shavkat Mirziyoyev raisligida bo‘lib o‘tayotgan videoselektor yig‘ilishida davlat rahbari tomonidan 2021-yilning 1-dekabridan Qishloq xo‘jaligi jamg‘armasi tomonidan meva-sabzavot yetishtiruvchilarni imtiyozli kreditlash yo‘lga qo‘yilishi ma’lum qilindi.

Bunda, “klaster – fermer – bank” zanjiri asosida, mahsulot hajmi va moliyalashtirish muddatlari aniq ko‘rsatilgan uch tomonlama shartnomalar tuziladi.

Kreditlar 12 oyga 6 oy imtiyozli davri bilan 14 foiz stavkada ajratiladi. Har bir mahsulot turiga qarab, moliyalashtirish sxemalari ishlab chiqiladi. Misol uchun, takroriy ekin uchun iyunda, to‘qsonbostiga sentyabrda mablag‘ ajratiladi. Klasterlarga tomorqalardan tayyor mahsulot sotib olishga aylanma mablag‘ uchun 12 oylik “revolver” kreditlar beriladi.

“Ya’ni, klaster qachon zarur bo‘lsa, mablag‘ni shunda oladi va foizini kreditdan foydalangan davr uchun to‘laydi. Bunda, paxta va g‘alladagi kabi, kredit garovi uchun sug‘urtalash tizimi joriy etiladi. Ushbu maqsadlar uchun jami 2 trillion so‘m alohida yo‘naltiriladi. Har bir viloyat hokimi eshitsin, pul tayyor turibdi. Endi uni aql bilan olishni o‘rganish kerak”, – dedi Mirziyoyev.

Xalqaro moliya tashkilotlari mablag‘lari hisobidan kichik intensiv bog‘, uzumzor va meva-sabzavotchilikni rivojlantirish uchun, 14 foizlik imtiyozli stavkada 100 million so‘mgacha garovsiz kredit beriladi. Bunga, xalqaro moliya tashkilotlarining 100 million dollar mablag‘i yo‘naltiriladi.

Shuningdek, davlat rahbari yana bir masala – eksport shartnomasi bo‘lgan meva-sabzavot yetishtiruvchilarga hosilni xavf-xatardan sug‘urtalash xarajatlarining 50 foizi byudjetdan qoplab berilishini ma’lum qildi.

“Klasterlar tomonidan chet eldan malakali agronom, entyemolog, laboratoriya mutaxassisi jalb qilish xarajatlarining 50 foizigacha qismiga subsidiya beriladi.

Mas’ullar ikki haftada “klaster – fermer – bank” o‘rtasidagi uch tomonlama shartnomaning namunaviy shaklini ishlab chiqib, soliq idoralarida elektron ro‘yxatga olish tizimini yo‘lga qo‘ysin”, – deya topshiriq berdi Prezident.

Qayd etilgan imtiyozlar shartnomalari ro‘yxatdan o‘tgan klasterlarga berilishi ta’kidlandi.