Buxoro ixtisoslashtirilgan “Jayron” pitomnigidan Sudoche ko‘liga Turkman qulonlari olib kelindi, deb xabar bermoqda “Sudoche-Aqpetkey” davlat buyurtma qo‘riqxonasi matbuot xizmati.
Ma’lum bo‘lishicha, Vazirlar Mahkamasining farmoyishiga asosan Buxoro ixtisoslashtirilgan “Jayron” pitomnigidan 175 bosh turkman qulonlarini “Janubiy Ustyurt” milliy tabiat bog‘i va “Saygachiy” buyurtma qo‘riqxonasiga ko‘chirish va mazkur noyob hayvonlarning tarixiy areallari bo‘lgan hududlarda ularning bosh sonini tiklash topshirig‘i belgilangan.
Shunga muvofiq, Davlat ekologiya qo‘mitasi tomonidan Favqulodda vaziyatlar vazirligi qoshidagi “Mo‘ynoq kelajak bunyodkorlari” bilan shartnoma imzolangan. Fanlar akademiyasi tavsiyasiga asosan 17 bosh turkman qulonini Qoraqalpog‘istondagi “Sudoche-Aqpetkey” davlat buyurtma qo‘riqxonasining Sudoche bo‘limiga ko‘chirish ishlari amalga oshirilgan.
Eslatib o‘tamiz, avvalroq Navoiyda Qizil kitobga kiritilgan mingdan ortiq yo‘rg‘a tuvaloqlar tabiatga qo‘yib yuborilgani xabar qilingan.
Izoh (0)