Бухоро ихтисослаштирилган «Жайрон» питомнигидан Судочье кўлига Туркман қулонлари олиб келинди, деб хабар бермоқда «Судочье-Ақпеткей» давлат буюртма қўриқхонаси матбуот хизмати.
Маълум бўлишича, Вазирлар Маҳкамасининг фармойишига асосан Бухоро ихтисослаштирилган «Жайрон» питомнигидан 175 бош туркман қулонларини «Жанубий Устюрт» миллий табиат боғи ва «Сайгачий» буюртма қўриқхонасига кўчириш ва мазкур ноёб ҳайвонларнинг тарихий ареаллари бўлган ҳудудларда уларнинг бош сонини тиклаш топшириғи белгиланган.
Шунга мувофиқ, Давлат экология қўмитаси томонидан Фавқулодда вазиятлар вазирлиги қошидаги «Мўйноқ келажак бунёдкорлари» билан шартнома имзоланган. Фанлар академияси тавсиясига асосан 17 бош туркман қулонини Қорақалпоғистондаги «Судочье-Ақпеткей» давлат буюртма қўриқхонасининг Судочье бўлимига кўчириш ишлари амалга оширилган.
Эслатиб ўтамиз, аввалроқ Навоийда Қизил китобга киритилган мингдан ортиқ йўрға тувалоқлар табиатга қўйиб юборилгани хабар қилинган.
Изоҳ (0)