O‘zbekiston Sog‘liqni saqlash vazirligining sog‘liqni saqlash muassasalarini loyihalash bo‘yicha bosh tashkiloti bo‘lgan “O‘ztibloyiha” MChJga turkiyalik tajribali mutaxassis Guray Kaymak direktor etib tayinlandi. Bu haqda vazirlik matbuot xizmati xabar berdi.
Ma’lumotlarga ko‘ra, 48 yoshli tajribali me’mor sanoat arxitekturasi mutaxassisligi bo‘yicha Turkiyada bakalavr, Makedoniyada magistratura darajasini olgan. Guray Kaymak 1993-yilda ish faoliyatini MNG Holding kompaniyasida boshlagan. U mazkur nufuzli shirkat mashhur Istanbul xalqaro aeroportini qurishda qatnashgan.
Mutaxassis keyinchalik Ruminiyada qator bank binolari, Turkiyada “Bayindir tib merkezi” tomonidan quriladigan tibbiyot muassasalarini loyihalashtirishda ishtirok etgan. U Toshkentdagi International Hotel Tashkent mehmonxonasi binosini loyihalashtirishda ham faollik ko‘rsatgan.
Uning so‘nggi yillardagi loyihalaridan biri 2020-yilda foydalanishga topshirilgan Namangandagi zamonaviy kutubxona binosi hisoblanadi. “O‘ztibloyiha” boshqaruviga kelgan yangi rahbar zimmasiga tibbiyot yo‘nalishiga oid qurilish obyektlarini eng ilg‘or andazalardan foydalanib loyihalashtirish yuklatilgan.
Shuningdek, u ilmiy-texnik konstruktorlik loyihalarini ishlab chiqish va amaliyotga tatbiq etish hamda bu borada texnik yordam ko‘rsatish, innovatsion texnologiyalar, ilmiy-texnik yangiliklar va nou-xaularni ishlab chiqish kabi vazifalarni bajarishga ham boshchilik qiladi.
Bundan tashqari, endilikda hududlarda mahalliy hokimliklar tomonidan tasdiqlanayotgan har bir tibbiyot muassasasi loyihasi Guray Kaymak boshchiligidagi “O‘ztibloyiha” tomonidan tasdiqlanishi belgilangan.
Avvalroq sog‘liqni saqlash vaziri Abduhakim Xojiboyev lavozimidan ozod etilgani va u O‘zbekiston kasaba uyushmalari federatsiyasiga o‘tishi kutilayotgani to‘g‘risida xabar berilgandi. Shu kunning o‘zida O‘zbekiston Prezidentining tegishli farmoni bilan bosh vazir o‘rinbosari lavozimida ishlab kelgan Behzod Musayev sog‘liqni saqlash vaziri etib tayinlangan.
Izoh (0)