O‘zbekistonda endi talabalar bilan tuzilgan ko‘chmas mulk ijara shartnomalarini ham E-ijara interaktiv xizmatida hisobga qo‘yish mumkin. Bu haqda Davlat soliq qo‘mitasi xabar qildi.
Ma’lum bo‘lishicha, ijaraga beruvchi “ijara.soliq.uz” saytiga kirib “Ijaraga oluvchi to‘g‘risida ma’lumot” oynasiga ijaraga oluvchi talabaning JShIRni kiritganda talabaga oid ma’lumotlar (F.I.O, ta’lim olayotgan o‘quv yurti, fakulteti, ta’lim shakli va bosqichi, shuningdek, doimiy ro‘yxatga olingan manzili) avtomatik shakllanadi. “Telefon raqami” qatoriga ijaraga oluvchi talabaning telefon raqami kiritilib, “Tasdiqlash kodini yuborish” tugmasi bosiladi. Talabaning telefoniga SMS orqali kelgan 5 xonali raqam “Tasdiqlash kodi” qatoriga yozilib, “Tasdiqlash” tugmasi bosiladi. “Tasdiqlash” tugmasini bosishdan avval ijaraga oluvchi talaba bilan birga turgan boshqa talabalarni ham “Qo‘shish” tugmasi orqali dasturga kiritish mumkin.
Qayd etilishicha, ijara shartnomalarini soliq organida hisobga qo‘yilgani to‘g‘risidagi guvohnomada talaba va u bilan birga turuvchi talabalar haqida ma’lumotlar ham shakllanadi. Talabalar bilan tuzilgan ijara shartnomalari hisobga qo‘yilganda ushbu ma’lumotlar Oliy va o‘rta maxsus ta‘lim vazirligi bazasida shakllanadi. Bu esa oylik ijara to‘lovining bir qismini qoplab berishda oliy o‘quv yurtlariga qulaylik yaratadi.
Eslatib o‘tamiz, Shavkat Mirziyoyev 2021-yilning aprel oyida ijarada yashayotgan talabalarga 1-maydan boshlab ijara to‘lovining yarmi davlat tomonidan qoplab berilishini aytgandi. Keyinchalik ijara to‘lovi xarajatlarining 50 foizi BHMning bir baravaridan oshmagan taqdirda to‘lab berilishi ma’lum bo‘lgan. Sentabr oyida talabalarga ijara to‘lovining bir qismini qoplab berish tartibi belgilangan.
Izoh (0)