Rossiyada og‘ir tan jarohati olgan va kasallikka chalingan ikki fuqaro O‘zbekistonga qaytarildi. Bu haqda Tashqi mehnat migratsiyasi agentligi xabar berdi.
Ulardan biri qoraqalpog‘istonlik S.M. bo‘lib, 2020-yilning dekabrida Rossiyaga ishlash maqsadida borgan va 2021-yilning sentabrida sog‘lig‘i keskin yomonlashgani sabab mehnatga layoqatsiz bo‘lib qolgan. Yana bir fuqaro namanganlik 51 yoshli J.B. bo‘lib, u 2021-yilning sentabrida Moskvaga ishlash uchun borgan va baxtsiz hodisa sabab oyog‘idan og‘ir jarohat olgan.
Tashqi mehnat migratsiyasi agentligi fuqarolarni jamg‘arma mablag‘lari hisobidan 19 va 21-noyabr kunlari Moskva—Toshkent aviareyslari orqali O‘zbekistonga qaytargan.
Ular agentlik xodimlari tomonidan Toshkent xalqaro aeroportida tez tibbiy yordam brigadasini jalb qilgan holda kutib olinib, Respublika shoshilinch tez tibbiy yordam ilmiy markaziga kuzatib qo‘yilgan.
Eslatib o‘tamiz, sentabr oyi oxirlarida salomatligi yomonlashib, qiyin ahvolda qolgan 5 nafar fuqaro, so‘ng avtohalokatga uchragan va qiyin ahvolda qolgan yana ikki fuqaro Rossiyadan O‘zbekistonga qaytarilgandi. Shuningdek, Rossiyadagi korxona ichkilikka berilgan 47 nafar o‘zbekistonlik migrant bilan mehnat shartnomasini bekor qilib, vatanga qaytarib yuborgandi.
Izoh (0)