Surxondaryoda tabiiy gazdan noqonuniy foydalangan 68 nafar iste’molchi aniqlandi

Surxondaryo viloyatida tabiiy gazdan noqonuniy foydalanayotgan iste’molchilar aniqlanib, tegishli chora ko‘rilmoqda. Bu haqda “Hududgaz Surxondaryo” gaz ta’minoti filiali axborot xizmati O‘zAga xabar qildi.

Qayd etilishicha, holatlardan birini Termiz shahridagi “Dexotiy” ko‘chasi, 30-uyda yashovchi fuqaro xonadonida vaqtincha ijarada turgan boshqa bir shaxs sodir etgani aniqlangan. Xonadonda ijarada yashayotgan bu fuqaro iste’mol qilingan tabiiy gazdan mavjud qarzdorligini to‘lamasdan elektron gaz hisoblash uskunasidan ham belgilangan me’yorlarga zid ravishda klapani ochiq holatda foydalanib kelayotgani ma’lum bo‘lgan.

O‘rganishlar chog‘ida xonadon iste’mol qilingan tabiiy gaz uchun 7 million 395 ming so‘m qarzdor ekani fosh etilib, tegishli tartibda rasmiylashtirilgach, elektron gaz hisoblash uskunasi masofaviy o‘chirilgan va tabiiy gaz berilishi vaqtincha to‘xtatilgan.

Shu ko‘chadagi 56-uyda yashovchi fuqaroning xonadoni tekshirilganida, tabiiy gaz quvuriga rezina shlangi orqali noqonuniy ulanib olgani aniqlangan. Tabiiyki xavflilik darajasi yuqori bo‘lgan bunday tartibda tabiiy gaz iste’moliga yo‘l qo‘yish taqiqlangan.

Xonadon ko‘zdan kechirilganida 12 million 323 ming so‘m qarzdorligi sababli “Billingaz” dasturida o‘chiq turgani va elektron gaz hisoblash uskunasiga qadar rezina shlang orqali ulanib olib, tabiiy gazdan noqonuniy foydalanayotgani oshkor etilgan.

Yilning o‘tgan davrida viloyatda tabiiy gazdan foydalanish qoidalarini buzish bilan bog‘liq 68 ta holat aniqlanib, tabiiy gaz zarari uchun 72 million 988 ming so‘mlik qayta hisob-kitob ishlari amalga oshirilgan.

Hozirgacha 40 million 428 so‘m undirilib, yetkazilgan zarar bartaraf etilgan. 32 million 560 so‘m tabiiy gaz zararini undirish uchun rasmiylashtirilgan hujjatlar tegishli tartibda sud organlariga taqdim etilgan.