O‘zbekiston Axborot texnologiyalari va kommunikatsiyalarini rivojlantirish vazirligiga 17-noyabr kuni yangi rahbar tayinlandi — shu vaqtgacha xalq ta’limi vaziri lavozimida ishlab kelgan Sherzod Shermatov eski ish joyiga qaytdi. U 2017—2018 yillarda ham AKT vaziri sifatida ish olib borgan. Vazirlikning undan avvalgi rahbari — Shuhrat Sodiqov noyabr oyi boshida Telegram va boshqa ijtimoiy tarmoqlarga kirish cheklanishi bilan bog‘liq mojaro ortidan lavozimidan ozod qilingan edi.
Qayd etish joiz, Axborot texnologiyalari va kommunikatsiyalarini rivojlantirish vazirligi O‘zbekistonning nomi eng ko‘p o‘zgargan davlat idoralaridan biridir. Mustaqillikning ilk yillarida u Aloqa vazirligi deb atalgan bo‘lsa, keyinchalik Pochta va telekommunikatsiyalar agentligi, Aloqa va axborotlashtirish agentligi, Aloqa, axborotlashtirish va telekommunikatsiya texnologiyalari davlat qo‘mitasi deb nomlangan. Shunday bo‘lsa-da, ushbu tashkilot qanday atalashidan qat’i nazar, xalq orasida uning rahbarlariga nisbatan “aloqa vaziri” ta’rifi saqlanib qolgan.
Izoh (0)