O‘zbekiston prezidentining tegishli farmoni bilan Zoir Mirzayev boshqa ishga o‘tishi munosabati bilan Qashqadaryo viloyati hokimi lavozimidan ozod etildi. Bu haqda davlat rahbarining matbuot kotibi Sherzod Asadov ma’lum qildi.
Zoir Mirzayev 2019-yilning oktabridan buyon Qashqadaryo viloyat hokimi sifatida ishlab kelayotgandi. Unga qadar Mirzayev bosh vazir o‘rinbosari hamda Qishloq va suv xo‘jaligi vaziri lavozimlarida faoliyat yuritib kelgan. 2018-yil oktabrida “Oqqo‘rg‘on voqeasi” sabab ishdan olinib, Sharof Rashidov tumaniga hokim etib tayinlangandi.
Shuningdek, prezident farmoni bilan Murodjon Azimov Qashqadaryo viloyati hokimi vazifasini bajaruvchi etib tayinlangan.
General-mayor Murodjon Azimov 2018-yilning fevralidan buyon Davlat bojxona qo‘mitasi raisi lavozimida ishlab kelayotgan edi. Bungacha Murodjon Azimov O‘zbekiston bosh prokurorining birinchi o‘rinbosari lavozimida ishlab kelayotgandi. U bu lavozimga 2016-yil iyulida tayinlangandi.
Avvalroq O‘zbekiston prezidentining tegishli farmoni bilan Qobul Tursunov Navoiy viloyati hokimi lavozimidan ozod etilgani va uning o‘rniga Toshkent shahar davlat soliq boshqarmasi boshlig‘i sifatida faoliyat yuritib kelgan Normat Tursunov tayinlangani to‘g‘risida xabar berilgandi.
Izoh (0)