Toshkent viloyati Sanitariya-epidemiologik osoyishtalik va jamoat salomatligi boshqarmasi va hududiy bo‘limlari tomonidan viloyatda koronavirusga qarshi emlanmagan fuqarolar aniqlanib, ularga qarshi chora ko‘rilmoqda. Bu haqda SEOM matbuot xizmati xabar berdi.
Ma’lum qilinishicha, aholi orasida qanchalik tushuntirish tadbirlari tashkil etilishiga qaramasdan Toshkent viloyati Sanitariya-epidemiologik osoyishtalik va jamoat salomatligi boshqarmasi va hududiy bo‘limlari tomonidan viloyatda 1863 ta tekshirish tadbirlari tashkil etilgan vaqtda 6526 nafar fuqaro vaksina olmagani aniqlangan. Ulardan 1402 nafari tadbirkorlik subyektlari va 5035 nafari esa budjet tashkilotlarida mehnat faoliyatini olib borayotgan fuqarolardir.
“Bu kabi fuqarolarga, albatta, qonunchilikda belgilangan talablarga amal qilmagani uchun qonuniy choralar ko‘rildi. Bunday holatlar Toshkent viloyatida 3608 tani tashkil etadi. Bular orasida 3229 nafar xodim vaqtincha ishdan chetlashtirilgan, 374 nafari tegishli tartibda jarimaga tortilgan bo‘lsa, beshtasi faoliyati to‘xtatilgan obyektlardir”, — deyiladi xabarda.
Sanitariya-epidemiologik osoyishtalik va jamoat salomatligi COVID-19 ga qarshi emlanish majburiy qilib belgilangani, bu kabi qonunlarga amal qilmaslik holatlari ustidan qattiq nazorat tadbirlari olib borilishini qayd etgan.
Ma’lumot uchun, mamlakatda aholini koronavirusga qarshi emlash tadbirlari 1-apreldan boshlandi. Emlash ixtiyoriy va bepul, fevral oyida vaksina olishdan bosh tortganlarga hech qanday chora ko‘rilmasligi aytilgandi. Iyun oxiridan boshlab esa Toshkentda 18 yoshdan oshganlar koronavirusga qarshi ommaviy emlash boshlangan.
Eslatib o‘tamiz, iyul o‘rtalarida O‘zbekistonda 18 yoshdan oshgan 14 ta toifadagi fuqarolar koronavirusga qarshi emlanishi shart etib belgilandi. Ular orasida aholi bilan muloqotga kiruvchi barcha turdagi xizmat ko‘rsatish obyektlarining (davlat xizmatlari markazlari, pochta bo‘linmalari, banklar, lizing tashkilotlari, notariuslar, sug‘urta kompaniyalari, go‘zallik salonlari, sartaroshxonalar va boshqalarning) xodimlari ham bor. Oliy Majlis Qonunchilik palatasi spikeri Nurdinjon Ismoilov O‘zbekistonda aholini majburiy emlash qonunga zid ekani va shunday bo‘ladigan taqdirda huquqiy hujjatlarga belgilangan tartibda o‘zgartish yoki qo‘shimchalar kiritish talab etilishini aytgandi.
Prezident Shavkat Mirziyoyev esa 28-iyul kuni bo‘lib o‘tgan videoselektor yig‘ilishida O‘zbekistondagi epidemiologik holat yomonlashganini qayd etib o‘tib, aholini COVID-19 ga qarshi emlanishga chaqirgandi. “Vaksina olganlar shifoxonadan to‘rt kunda chiqyapti, emlanmaganlarga esa juda og‘ir bo‘lyapti. Ha, vaksina olgandan keyin kasallanish mumkin, lekin kasallik yengil formada kechyapti”, — dedi davlat rahbari va hokimlarga vaksinatsiya bo‘yicha ishlarni qattiqqo‘llik bilan nazoratga olishni topshirganini ham ta’kidlab o‘tgan.
Izoh (0)