Bir sutkadan ko‘proq vaqtga kechiktirilgan Toshkent—Istanbul reysi uchib ketdi

Turkish Airlines’ning TK-369D reysi 18-noyabr kuni ertalab Toshkentdan Istanbulga bir sutkadan ortiq kechikish bilan parvozni amalga oshirdi. Bu haqda Uzbekistan Airports matbuot xizmati xabar berdi.

Ma’lum qilinishicha, parvoz 17-noyabr kuni ertalab soat 09:45 ga belgilangan edi. Yo‘lovchilarni ro‘yxatdan o‘tkazish soat 06:00 da — jo‘nashdan uch soat oldin boshlangan. Biroq Toshkentdagi ob-havo sharoiti tufayli reys besh soatga kechiktirilgan.

Aeroportda ushlanib qolingandan so‘ng, samolyot ekipaji smena tugashi va parvozning bekor qilinishini e’lon qilgan. Yo‘lovchilar aeroportga qaytishgan. Ertalabki parvoz uchun chiptalar qayta ro‘yxatdan o‘tkazilgan. Yo‘lovchilarning bir qismi shaharga qaytgan.

“Aeroportda qolishga majbur bo‘lganlar issiq ovqat bilan ta’minlangan va kutish uchun sharoit yaratilgan”, — deyiladi kompaniya xabarida.

Eslatib o‘tamiz, 17-noyabr kuni Uzbekistan Airways aviakompaniyasi ob-havo noqulayligi sabab bir qator xalqaro va mahalliy reyslar parvozini kechiktirgan edi. Keyinroq kechiktirilgan barcha reyslar o‘z yo‘nalishi bo‘yicha uchib ketgani ma’lum qilindi. Faqat Turkish Airlines aviakompaniyasining Toshkent—Istanbul yo‘nalishi bo‘yicha uchishi kerak bo‘lgan TK-369 reysi noma’lum muddatga qoldirilgan edi.