Dunyo va o‘zbek sportiga oid 17-noyabr tongining eng muhim xabarlari dayjesti bilan tanishing.
O‘zbekiston
Doston Tursunov Italiyada operatsiya qilinadi
Noyabr oyidagi yig‘inda jarohat olgan O‘zbekiston terma jamoasi markaziy himoyachisi Doston Tursunov Italiyaning Rim shahridagi “Villa Stuart” shifoxonasida jarrohlik amaliyotini boshdan kechiradi.
“Chunsin” klubi futbolchisi Gruziyaga qarshi o‘yin oldi mashg‘ulotlarida jarohat olgan. Tibbiy tekshiruvlardan keyin Tursunovga operatsiya kerakligi ma’lum bo‘lgandi.
Avvalroq Farrux Ikromov ham aynan ushbu shifoxonada muvaffaqiyatli operatsiya qilingan va xarajatlar O‘FA tomonidan qoplangandi.
O‘zbekistonlik karatechi ilk bor JCh finalida jang qiladi
BAAning Dubay shahrida karate bo‘yicha Jahon chempionati bahslari bo‘lib o‘tmoqda. Karate WKF bo‘yicha -75 kg vazn toifasida O‘zbekiston sharafini himoya qilgan Dostonbek Otabolayev finalga yo‘l oldi. U 20-noyabr kuni hal qiluvchi bahsda Misr vakiliga qarshi jang qiladi.
Qayd etish kerak, tarixda ilk bor o‘zbekistonlik karatechi Jahon chempionati finaliga yo‘llanma oldi.
Server Jeparov shogirdlari xalqaro musobaqaga jo‘nab ketdi
O‘zbekiston U-15 terma jamoasi 19–23-noyabr kunlari Tojikistonda o‘tkaziladigan CAFA U-15 musobaqasida ishtirok etadi. 17-noyabr tongida Jeparov qo‘l ostidagi jamoa Dushanbega jo‘nab ketdi.
Jahon
Yevropada JCh—2022 saralashining guruh bosqichi yakunlandiGuruh g‘oliblari to‘g‘ridan to‘g‘ri yo‘llanmaga ega bo‘ldi. Ikkinchi o‘rin egalari va Millatlar Ligasida eng yaxshi natija qayd etgan ikki jamoa o‘tish bahslarida qatnashadi.
UEFA mintaqasida to‘g‘ridan to‘g‘ri yo‘llanma olgan jamoalar: Xorvatiya, Germaniya, Daniya, Belgiya, Fransiya, Ispaniya, Niderlandiya, Serbiya, Angliya va Shveysariya.
O‘tish o‘yinlarida qatnashadiganlar: Portugaliya, Shotlandiya, Italiya, Rossiya, Shvetsiya, Uels, Turkiya, Polsha, Shimoliy Makedoniya, Ukraina, Avstriya, Chexiya.
UEFA o‘tish o‘yinlari haqida
Ikkinchi o‘rin olgan 10 ta jamoa hamda Millatlar Ligasida eng yaxshi natija qayd etgan Avstriya va Chexiya o‘tish bahslarida qatnashadi.
- 1-savatcha: Portugaliya, Shotlandiya, Italiya, Rossiya, Shvetsiya, Uels.
- 2-savatcha: Turkiya, Polsha, Shimoliy Makedoniya, Ukraina, Avstriya, Chexiya.
Keyn va Depay — saralash bahslari to‘purarlari
UEFA mintaqasi guruh bosqichida ortda qolgan o‘nta turdan keyin Angliya hujumchisi Harri Keyn va Niderlandiya forvardi Memfis Depay 12 tadan gol bilan to‘purarlar ro‘yxatida birinchi bo‘ldi.
Oltitadan assist qayd etgan Memfis Depay, Leon Goretska (Germaniya) va Dushan Tadich (Serbiya) eng ko‘p golli uzatma amalga oshirgan futbolchilar sifatida qayd etildi.
APL rahbari “Nyukasl”ning saudiyaliklarga sotilishi sabab o‘z lavozimini tark etadi
Premyer Liga rahbari Gari Hoffman o‘z lavozimini tark etadi. Oktabr oyida APL klublari “Nyukasl”ning Saudiya Arabistoni hukumatiga tegishli fond tomonidan sotib olinganiga e’tiroz bildirgandi. Hoffman ushbu kelishuvda aybni o‘z zimmasiga olgan.
Yaqin vaqt ichida Hoffmanning ketishi borasidagi ma’lumot rasman e’lon qilinishi kutilmoqda, deya xabar qilmoqda BBC. U 2020-yilning aprel oyida liga boshqaruvini o‘z qo‘liga olgandi.
Dani Alves “Barselona”da 8-raqamda harakat qiladi
Braziliyalik himoyachi Kataloniya klubida 8-raqam ostida to‘p suradi. Klubda ushbu raqamda uzoq vaqt davomida Andres Inyesta harakat qilgan.
Qayd etish kerak, bu “Barselona”dagi yagona bo‘sh raqam bo‘lib, Miralem Pyanich “Beshiktosh”ga o‘tib ketganidan keyin egasiz qolgandi.
Braziliya terma jamoasiga texnik mag‘lubiyat yozilishi mumkin
JCh—2022 saralashi doirasida o‘tkazilmay qolgan Braziliya — Argentina uchrashuvida katta ehtimol bilan “pentakampionlar”ga texnik mag‘lubiyat yoziladi, deya xabar qilmoqda TNT Sports.
5-sentabr kungi bahs boshlanganidan to‘rt daqiqa o‘tib, to‘xtab qolgandi. Braziliya sog‘liqni nazorat qilish tashkiloti Argentinaning to‘rt futbolchisini (Emiliano Martines, Emiliano Buendia, Jovani Lo Chelso va Kristian Romero) mamlakatga kirishda karantin qoidalarini buzganlikda ayblagan va politsiya uchrashuvni to‘xtatib qo‘ygandi.
Ushbu jamoalar o‘rtasidagi javob uchrashuvi Toshkent vaqti bilan 17-noyabr tongida o‘tkazildi va unda nursiz durang qayd etildi.
Izoh (0)