13-noyabr kuni xalq deputatlari Qiziltepa tumani kengashining navbatdan tashqari sessiyasi bo‘lib o‘tdi, deb xabar beradi Navoiy viloyati hokimligi axborot xizmati.
Ma’lum qilinishicha, tashkiliy masala ko‘rib chiqilgan mazkur sessiya ishida Navoiy viloyati hokimi vazifasini bajaruvchi Normat Tursunov so‘zga chiqib, tuman hokimi lavozimida ishlab kelayotgan Shabon Nabiyevni boshqa ishga o‘tgani munosabati bilan vazifasidan ozod etish hamda tuman hokimi lavozimiga Ulug‘bek Fayziyevni tayinlash to‘g‘risida qabul qilingan qarorini o‘qib eshittirgan.
Ushbu qaror xalq deputatlari Qiziltepa tumani kengashi deputatlari tomonidan ma’qullangan.
Ulug‘bek Fayziyev senator va tadbirkor, Navoiy shahridagi Zarafshan Golden Group MChJ ta’sischisi hisoblanadi. Ushbu kompaniya Navoiy viloyatida va Toshkent shahrida ko‘p qavatli turar joy binolarini, shuningdek, ishlab chiqarish obyektlari, ichki avtomobil yo‘llarini qurish, bog‘chalarni ta’mirlash va boshqa qator qurilish ishlari bilan shug‘ullanadi.
Avvalroq Navoiy viloyati hokimi Qobul Tursunov sog‘lig‘i tufayli o‘z arizasiga ko‘ra vazifasidan ozod etilgani, Shu vaqtga qadar Toshkent shahar Davlat soliq boshqarmasi boshlig‘i lavozimida faoliyat yuritib kelgan Normat Tursunov Navoiy viloyati hokimi vazifasini bajaruvchi etib tayinlangani to‘g‘risida xabar berilgandi.
Izoh (0)