Shavkat Mirziyoyev: “Respublika kardiologiya markazi klinikasi faoliyatini ko‘p tarmoqli shaklga o‘tkazish vaqti keldi”

Shavkat Mirziyoyev raisligida o‘tgan yurak-qon tomir kasalliklari mavzusidagi videoselektor yig‘ilishida davlat rahbari Respublika kardiologiya markazi faoliyati butunlay o‘zgarishi kerakligini ta’kidladi, deya xabar qilmoqda “Daryo” muxbiri.

Bunda Kardiologiya markazida 15 dan ziyod yuqori texnologik amaliyot yo‘lga qo‘yilishi bildirildi.

“Buning uchun:

• Kardiologiya markazi rahbari (Xurshid Fozilov) Rossiyaning Bakulev nomidagi yurak-qon tomir kasalliklari jarrohlik markazi va Germaniyaning Sharite universiteti kabi nufuzli tibbiyot tashkilotlarida yiliga 30-50 tadan shifokor malakasini oshirishni ta’minlaydi. Ushbu xarajatlar budjetdan qoplab beriladi;
• Markazga preventiv kardiologiya, nur yordamida diagnostika kabi yo‘nalishlarda yangi ilmiy-tadqiqotlar uchun zamonaviy laboratoriyalar tashkil etiladi.

Buning uchun SSV vaziri Hojiboyev, Qudratov kelgusi yil 1-fevralga qadar markazga ushbu maqsadlar uchun 5 million dollar mablag‘ jalb qilsin”, – deydi Mirziyoyev.

Davlat rahbari qon tomir orqali yurakdan tashqari boshqa kasalliklarni davolash yo‘lga qo‘yilganini inobatga olib, ushbu markaz klinikasi faoliyatini ko‘p tarmoqli shaklga o‘tkazish vaqti kelganini aytdi.

Prezident tomonidan Behzod Musayev, Laziz To‘ychiyev, A.Hojiboyev, Kardiologiya markazi rahbari (Xurshid Fozilovga) uch oy muddatda markaz faoliyatini transformatsiya qilish bo‘yicha yangi taklif kiritishi haqida topshiriq berildi.