Ayni vaqtda xalq deputatlari Navoiy viloyati kengashining navbatdan tashqari sessiyasida Navoiy viloyati hokimi lavozimida ishlab kelgan Qobul Tursunov vazifasidan ozod qilinishi kutilmoqda, deb xabar beradi “Gazeta.uz”.
Sessiya soat 12:00 da boshlangan. “Gazeta.uz” va “Kun.uz” manbalarining ma’lum qilishicha, uning o‘rniga “Xalq banki” boshqaruvi raisi lavozimida faoliyat yuritib kelgan Shuhrat Atabayev yangi hokim etib tasdiqlanishi kutilmoqda. Ayni vaqtda Telegram’dagi “Bank va mijoz” kanalining yozishicha, hokim vazifasiga kirishuvchi biror-bir tijorat bank boshqaruv raisi lavozimida ishlamaydi. “Davletovuz” kanalining (tasdiqlanmagan) ma’lumotlariga ko‘ra, Qobul Tursunov o‘rniga Toshkent shahar davlat soliq boshqarmasi boshlig‘i Normat Tursunov Navoiy viloyati hokimi etib tayinlanishi mumkin.
Qobul Tursunov 2016-yil 25-dekabrdan beri Navoiy viloyati hokimi vazifasida ishlab kelayotgandi. Bunga qadar u Oliy Majlis Senatining Budjet va iqtisodiy islohotlar masalalari bo‘yicha qo‘mitasi raisi lavozimida faoliyat yuritgan.
Eslatib o‘tamiz, aprel oyida Prezident Shavkat Mirziyoyev videoselektor yig‘ilishida Qashqadaryo va Navoiy viloyatlari hokimlariga hamda Markaziy bank raisining birinchi o‘rinbosariga hayfsan bergan edi. O‘shanda tadbirkorlarning 7 mingdan ortiq muamosi (24 foiz) yechilmasdan qolayotgani ayilgandi. Ular faoliyatidagi to‘siqlar haqida ma’lum qilgan. Bu viloyatlar orasidagi eng yomon ko‘rsatkich. Davlat rahbari Navoiy viloyatidagi 10 ta kichik sanoat zonalarining 72 gektar yeriga (66 foiz) biror ham loyiha joylashtirilmaganini qayd etgandi. Prezident “chorak yakunigacha o‘zgarish bo‘lmasa, barchasi ishdan ketadi”, deya ogohlantirgan edi.
Avvalroq Prezident huzuridagi Davlat xizmatini rivojlantirish agentligi O‘zbekistonning barcha tuman, (shahar)larida hokim va hokim o‘rinbosarlari faoliyatining baholash reytingini e’lon qilgandi. Unda viloyatlarning top tumanlari reytingida Navoiy viloyati yetakchilik qilgan.
Izoh (0)