Changli tuman 6-noyabr kuni ham davom etishi mumkin — “O‘zgidromet”

O‘zbekiston Gidrometeorologiya xizmati markazi mamlakatning ayrim viloyatlarida 4-noyabrdan buyon kuzatilayotgan g‘ayrioddiy chang-qumli bo‘ron haqida ma’lumot berdi, deb yozadi “Gazeta.uz”.

Ma’lum qilinishicha, 4-noyabr kuni O‘zbekiston hududiga Ural tomonlardan sovuq havo oqimi kirib kelgan. Sovuq havo fronti zonasida shamol tezligi 12-15 metr/soniyaga qadar kuchaygan, Buxoro, Navoiy, Jizzax viloyatlarida esa soniyasiga 20-25 metrga qadar yetgan. Kuchli shamol ta’sirida yerning qurigan ustki qatlami yuqoriga ko‘tarilib, respublikaning qator tumanlarida ko‘rishning 100-200 metrgacha yomonlashishi orqali chang-qumli tumanni hosil qilgan.

“O‘zgidromet”ning ma’lum qilishicha, O‘zbekistonda Markaziy Osiyoning boshqa davlatlari kabi chang bo‘ronlari — tez-tez uchrab turadigan hodisa. Biroq odatda qum yoki chang massasining havoga ko‘tarilishi shamol tinishi bilan yerga cho‘kib, tarqalib ketadi. Mazkur holatda esa 4–5-noyabr kunlari sovuq havo massasi shakllangan atmosferaning quyi qatlamlaridagi inversion qatlam changning cho‘kish jarayonini ushlab turibdi, natijada mintaqa uchun g‘ayrioddiy bo‘lgan changli tuman yuzaga kelgan.

Qayd etilishicha, tuman sekin-asta tarqalmoqda va katta ehtimol bilan 6-noyabr kuni ham davom etadi.

Sirdaryoda 4-noyabr kuni boshlangan chang bo‘roni kechga borib Toshkentga ham yetib keldi. Chang tufayli atrofni ko‘rish darajasi cheklandi. Avtomobillar harakati sekinlashdi. Keyinroq “O‘zgidromet”ning buning oqibatida havodagi chang miqdori belgilangan me’yordan 5 barobarga oshganini bildirdi. Nafas olishda muammolar yuzaga kelgan poytaxt aholisi tibbiyot muassasalariga murojaat qilishni boshladi, 5-noyabr kuni esa Sog‘liqni saqlash vazirligi fuqarolarga chang bo‘ronida nimalar qilish bo‘yicha tavsiyalar berdi.