O‘zbekiston Respublikasi Prezidenti Shavkat Mirziyoyev 5-noyabr kuni Ozarbayjon Respublikasi prezidenti Ilhom Aliyev bilan telefon orqali muloqot qildi.
Suhbat avvalida Ozarbayjon prezidenti davlatimiz rahbarini mamlakatda o‘tgan prezident saylovida ishonchli g‘alaba qozongani bilan samimiy qutlab, O‘zbekiston xalqining farovonligi va ravnaqini ta’minlash borasidagi faoliyatiga katta muvaffaqiyatlar tiladi.
O‘zbekiston yetakchisi, o‘z navbatida, Ozarbayjon rahbari va birodar xalqini yaqinlashib kelayotgan milliy bayram – G‘alaba kuni bilan samimiy muborakbod etib, tinchlik-osoyishtalik va bardavom taraqqiyot tilaklarini izhor etdi.
Ma’lumot uchun, 2020-yil kuzida Ozarbayjon va Armaniston o‘rtasida harbiy harakatlar bo‘lib o‘tgan edi. Ikki mamlakat Rossiya vositachiligida 9-noyabrdan 10-noyabrga o‘tar kechasidan boshlab Tog‘li Qorabog‘da urushni tugatishga kelishib oldi. Shu munosabat bilan Ozarbayjonda 9-noyabr G‘alaba kuni deb e’lon qilingandi.
Mavzuga doir: Shavkat Mirziyoyev: “O‘zbekiston Tog‘li Qorabog‘ hududini tiklashda ko‘mak berishga tayyor”
Yetakchilar o‘zaro savdo ko‘rsatkichlari barqaror sur’at bilan o‘sayotgani, iqtisodiyotning turli tarmoqlarida qo‘shma loyihalar soni ortayotganini katta mamnuniyat bilan qayd etdilar. 2021-yilda Hojiqabul shahrida avtomobillar ishlab chiqarish yo‘lga qo‘yilgani, qishloq xo‘jaligi va ipakchilikda amalga oshirilayotgan qo‘shma loyihalar muvaffaqiyatli kooperatsiyaga misol ekani ta’kidlandi.
Kelgusi oyda Boku shahrida O‘zbekiston milliy sanoat ko‘rgazmasi o‘tkaziladi. Hukumatlararo komissiya va Ishbilarmonlar kengashining navbatdagi yig‘ilishlariga tayyorgarlik ko‘rilmoqda.
Transport–kommunikatsiya sohasidagi hamkorlik, shu jumladan, poytaxtlar o‘rtasidagi aviaqatnovlarni tiklash masalalari ko‘rib chiqildi.
O‘zbekiston va Ozarbayjon hududida qo‘shma madaniy-gumanitar tadbirlarni muntazam o‘tkazib turish muhim ekani qayd etildi.
Prezidentlar mintaqaviy hamkorlikning eng muhim jihatlari, shu jumladan, Turkiy kengashning bo‘lajak sammiti kun tartibi yuzasidan fikr almashdilar. Oliy darajadagi uchrashuvlar rejasi ko‘rib chiqildi.
Izoh (0)