5- ноябрь куни АОКАда туризм ва спорт вазирининг биринчи ўринбосари Улуғбек Аъзамов, бошқарма бошлиғи Иброҳим Барноев, вазирлик ахборот хизмати раҳбари Лола Раҳмонбоева иштирокида матбуот анжумани ўтказилди.
Анжуманда хабар берилишича, 2021 йилнинг 9 ойи давомида маҳаллий ҳокимликлар ва вазирлик, идора, ташкилотлар билан ҳамкорликда 3 миллион 700 минг нафардан ортиқ ўзбекистонликларнинг саёҳатлари тизимли амалга оширилди.
Туризм соҳасини тиклаш учун олиб борилган амалий ишлар натижасида 2021 йилнинг 9 ойи давомида Ўзбекистонга 1 миллион 200 минг (1 135 621) нафарга яқин хорижий сайёҳ ташриф буюрди ва 273 миллион доллар миқдорида туризм хизматлари экспорт қилинди.
Таҳлилларга кўра, 2021 йилда айрим Ғарбий Европа, Америка ва МДҲ давлатларидан кутилганидан кўпроқ сайёҳлар ташриф буюрмоқда. Япония, Хитой, Ҳиндистон ва Жануби-шарқий Осиё (Индонезия, Малайзия, Сингапур, Таиланд, Тайван, Жанубий Корея) давлатлардаги чекловлар сабабли прогноз қилинган кўрсаткичлардан кам миқдорда сайёҳ келган.
Йил давомида мазкур тоифадаги сайёҳлар сонини 1 миллион 700 минг нафарга етказиш прогноз қилинган. Қайд этилишича эмлаш жараёни йўлга қўйилганидан кейин халқаро туризм жонланди.
2021 йилнинг январь–март ойларида ўртача ҳар ойда 85 минг нафар хорижий фуқаролари сайёҳ сифатида Ўзбекистонга кириб келган бўлса, бу кўрсаткич август ва сентябрь ойларида деярли 190 мингга етган.
Бундан аввал Шаҳрисабз, Марғилон ва Хивада Маданий мерос техникумлари ташкил этилиши, Тошкент вилоятида туристик зоналарни барпо этишга 1 млрд доллар инвестиция жалб этилиши ҳамда Ўзбекистонда меҳмонхоналар сони қанчага етгани маълум қилингани ҳақида хабар берилганди.
Изоҳ (0)