Parkent tumanidagi xonadonda sherlar achinarli ahvolda boqilayotgani aniqlandi (video)
Toshkent viloyati Parkent tumanida joylashgan xonadonlarning birida sherlar boqilayotgani ma’lum bo‘ldi. Bu haqda Telegram’dagi “Ekologuz” kanali xabar berdi.
Ma’lum qilinishicha, murojaat bo‘yicha “Mehr va oqibat” hayvonlarni himoya qilish NNT vakili, Parkent tuman Ekologiya boshqarmasi vakillari bilan ushbu xonadonga tashrif buyurilgan.
Aniqlanishicha, Krasnogors shaharchasidan chiqib ketishdagi dala hovlilarning birida ikkita sher (erkak va urg‘ochi) va ularning bolasi boqilmoqda. Ta’kidlanishicha, sherlar tor, qorong‘i yerto‘lasimon joyda saqlanyapti, bolasining bir ko‘zi parda bilan qoplangan. U ota-onasidan ajratib olingan.
Uy egasining aytishicha, sherlar Andijon hayvonot bog‘idan sotib olingan bo‘lib, barcha hujjatlari mavjud (ammo ularni taqdim etmagan) va ular Krasnogorskda xususiy hayvonot bog‘ini ochish harakatida.
“Ammo hali bog‘ga yer ajratilmagan. Sherlarning qorni to‘qdir balki, ammo 2 yildan buyon qorong‘i joyda saqlanayotgan sherlarni ko‘rib, yuragim ezilib ketdi. Hayvonot bog‘i ochilgan taqdirda ham bor-budini bugungi kunda sherlarning qornini to‘ydirishga sarflayotgan oila a’zolari undan qanchalik daromad ola olishadi? (Yopilgan Navoiy hayvonot bog‘iga kirish 5000 so‘m edi. Albatta, kelayotgan daromad bilan hayvonlarning qornini to‘ydirib bo‘lmasdi)”, — deb yozadi post muallifi.
Kanal muallifi hayvonot bog‘i ochilgunga qadar sherlar Toshkent hayvonot bog‘iga ko‘chirish taklifini berib, hayvonlar taqdiriga Ekologiya qo‘mitasi va Ekopartiya befarq qolmasligiga umid bildirgan.
Eslatib o‘tamiz, 2020-yilda Navoiy viloyati prokuraturasi “Mehr va oqibat” hayvonlarni himoya qilish jamiyatining murojaatiga asosan xususiy hayvonot bog‘i direktori Sohiba Barnoyevaga nisbatan hayvonlarni saqlashdagi qonunbuzarligiga oid ishni ko‘rib chiqib, 21-dekabr kuni xususiy bog‘ direktoriga nisbatan ogohlantirish e’lon qilgan va barcha kamchiliklarni bartaraf etishga besh kun muhlat bergandi. Berilgan muddat ichida qonunbuzarlik holatlari bartaraf etilmasa, ish qayta ko‘rib chiqiladi. Ushbu hayvonot bog‘ida saqlangan hayvonlar reabilitatsiya uchun Toshkentga olib kelingan.
Mavzuga doir:
