Тошкент вилояти Паркент туманида жойлашган хонадонларнинг бирида шерлар ачинарли аҳволда боқилаётгани тўғрисида хабар берилганди. Экология ва атроф-муҳитни муҳофаза қилиш давлат қўмитасининг маълум қилишича, зоопитомникда сақланаётган шерларнинг умумий аҳволи яхши.
Маълум қилинишича, қўмита томонидан 2019 йил 10 октябрь куни фуқаро Х.А.га ёввойи ҳайвонлар сақланадиган ва кўпайтириладиган питомник, шунингдек, зоология коллекцияларини ҳисобга қўйиш тўғрисида гувоҳнома расмийлаштирилган. Ёввойи ҳайвонларни сақлаш ва кўпайтириш бўйича Wildlife МЧЖ питомниги Тошкент вилоятининг «Боғишамол» дала ҳовли ҳудудида жойлашган.
Питомник раҳбари Х.А. томонидан Африка шерлари (1 дона эркак ва 1 дона урғочи) 2020 йилнинг 3 октябрь куни Андижон вилоятининг Марҳамат туманидаги «Шоу панда арена» ҳаваскорлик цирк гуруҳи раҳбари билан шартнома тузилиб, сотиб олинган. Питомникда сақланаётган ёввойи ҳайвонлар бўйича Давлат экология қўмитасига 2021 йилнинг январь ойида тақдим этилган ҳисоботга мувофиқ, шерлар 2017 йилда туғилган, озуқа рационига гўшт, тухум ва турли витаминлар белгиланган. Улар ўз вақтида берилади. Эркак шернинг вазни 230 килограмм, урғочи шернинг вазни 170 килограмм, ёввойи ҳайвонларга эмлаш ишлари муддатида олиб борилган ҳамда уларнинг умумий аҳволи яхши.
Шунингдек, Wildlife МЧЖ раҳбари билан мулоқот давомида 8 сентябрь куни зоопитомникда 1 дона бош шер боласи ўнг кўз катарактаси билан туғилгани ҳамда махсус муолажалар ўз вақтида олиб борилиши маълум бўлди. Шерларнинг очиқ ҳавода айланиши учун қўшимча 24 метр квадрат майдонга эга мустаҳкам панжарали усти берк валер ташкил этилган.
Эслатиб ўтамиз, 2020 йилда Навоий вилояти прокуратураси «Меҳр ва оқибат» ҳайвонларни ҳимоя қилиш жамиятининг мурожаатига асосан хусусий ҳайвонот боғи директори Соҳиба Барноевага нисбатан ҳайвонларни сақлашдаги қонунбузарлигига оид ишни кўриб чиқиб, 21 декабрь куни хусусий боғ директорига нисбатан огоҳлантириш эълон қилган ва барча камчиликларни бартараф этишга беш кун муҳлат берганди. Берилган муддат ичида қонунбузарлик ҳолатлари бартараф этилмагач, иш қайта кўриб чиқилган. Ушбу ҳайвонот боғида сақланган ҳайвонлар реабилитация учун Тошкентга олиб келинганди.
Изоҳ (0)