Ўзбекистонда мавжуд 14 534 та кўприк ва йўл ўтказгичнинг деярли 6 мингтаси таъмирталаб, 914 таси яроқсиз ҳолатда. Бу ҳақда 2 ноябрь куни бўлиб ўтган брифингда «Ўзйўлинспекция» матбуот хизмати раҳбари Комил Шамсиддинов маълум қилди.
«Автомобиль йўлларидаги сунъий иншоотларнинг ҳолати қайта хатлов ўтказиш натижаларига кўра Республика бўйича жами 14 534 та кўприк ва йўл ўтказгичлар мавжуд бўлиб, шундан 7668 таси қониқарли, 5952 таси таъмирталаб ва 914 таси яроқсиз ҳолатда экани аниқланди. Таъмирталаб ва яроқсиз ҳолдаги сунъий иншоотларни таъмирлаш ишларини амалга ошириш бўйича қисқа муддатли манзилли рўйхатига таклиф киритилди», — деган Комил Шамсиддинов.
Шунингдек, унинг айтишича, йўл қурилиш объектларида ва йўл қурилиши материаллари ишлаб чиқаришда қўпол равишда қоидабузилишларга йўл қўйган, давлат инспекторлари томонидан берилган кўрсатмаларни белгиланган муддатда бартараф этмаган мансабдор шахсларга нисбатан Маъмурий жавобгарлик тўғрисидаги кодекснинг 99 ва 147-модаллари асосида тегишли чоралар қўлланган.
Хусусан, 184 та маъмурий баённома расмийлаштирилиб, суд органларига юборилган ва бугунги кунда судлар томонидан 157 таси бўйича 192 миллион 18 минг сўм ундирилган.
Изоҳ (0)