Ўзбекистонда 2021 йилнинг 9 ойи давомида банклар томонидан 41 932 нафар жисмоний шахсга ипотека кредити ажратилди. Бу ҳақда Марказий банк маълумотларига таяниб, Spot хабар берди.
Маълум бўлишича, шу вақт ичида берилган ипотека кредитларининг умумий ҳажми 6,1 триллион сўмни ташкил этиб, ўтган йилнинг шу даврига нисбатан 4,8 фоизга камайган.
Ушбу маблағларнинг 80 фоизи ёки 4,89 триллион сўм бирламчи бозорда уй-жой сотиб олиш учун берилган кредитларга тўғри келади. Кўрсаткич ўтган йилгига нисбатан 28,7 фоизга пастлаган. Кредит маблағларининг 20 фоизи ёки 1,25 триллион сўм иккиламчи бозордан уй-жой сотиб олиш учун берилган. Бу 2020 йилнинг 9 ойидагига нисбатан 8,6 баробарга кўп.
Қайд этилишича, иккиламчи бозордан уй-жой сотиб олиш учун берилган кредитларнинг асосий қисми «Ўзбекистон ипотекани қайта молиялаштириш компанияси» АЖ маблағлари ҳисобидан ажратилган – 1,208 триллион сўм.
2020 йил февраль ойида жорий этилган янги давлат дастури бўйича ипотека кредитларига талаб ҳам сезиларли даражада ошган. Январь—сентябрь ойларида 2,86 триллион сўм муомалага чиқарилган. Бу ўтган йилнинг шу даврига нисбатан 3,6 баробар кўп.
Таъкидланишича, 2021 йил бошидан бери берилган ипотека кредитлари умумий ҳажмининг 26,8 фоизи Тошкент шаҳрига тўғри келган — 1,64 триллион сўм. Кейинги ўринларда Самарқанд (585 миллиард сўм) ва Фарғона (570 миллиард сўм) вилоятлари қайд этилган.
Бундан ташқари, ипотека кредитлари қолдиғи 1 октябрь ҳолатига кўра, ўтган йилнинг шу даврига нисбатан 26,2 фоизга ошиб, 32,8 триллион сўмни ташкил этган.
Мавзуга доир:
Изоҳ (0)