Марказий банк 2021 йил 9 ойи якунлари бўйича тижорат банклари томонидан амалга оширилган кредитлаш ва банкларда юзага келган муаммоли кредитларнинг турли сегментлари бўйича ўтказилган таҳлил натижаларини тақдим этди. Бу ҳақда «Spot» хабар бермоқда.
Таҳлил натижаларига кўра, жорий йил 9 ойи давомида банк тизимида жисмоний шахсларнинг муаммоли кредитлари ҳажми 5,4 бараварга ўсган.
Қайд этилишича, банк тизимида муаммоли кредитлар улуши 2021 йилнинг июль ойида энг юқори даражага (6,2 фоиз) етган. Муаммоли кредитлар улуши август—сентябрь ойларида 0,4 фоизга камайиб, 1 октябрь ҳолатига 5,8 фоизни ёки 18,1 триллион сўмни ташкил этган.
Мижозлар бўйича муаммоли кредитларнинг 29 фоизи (5,2 триллион сўм) жисмоний шахслар ва 71 фоизи (12,9 триллион сўм) юридик шахсларга ажратилган кредитлар ҳиссасига тўғри келади.
Таъкидланишича, тармоқлар кесимида муаммоли кредитларнинг ўсиши, асосан, транспорт ва коммуникация, қишлоқ хўжалиги, савдо ва умумий овқатланиш ва қурилиш соҳалари ҳиссасига тўғри келган.
Шунингдек, 2021 йил 9 ойи давомида банк тизимида юридик шахсларнинг муаммоли кредитлари ҳажми 2,6 бараварга ўсган. Жисмоний шахсларнинг муаммоли кредитлари ҳажми эса 5,4 баравар ошиб, уларнинг жами муаммоли кредитлардаги улуши 17 фоиздан 29 фоизга етган.
Мавзуга доир: Шавкат Мирзиёев муаммоли кредитлар бўйича масъул раҳбарларни танқид қилиб, қарздорликларни ундириш юзасидан топшириқ берди
Изоҳ (0)