O‘zbekiston Oliy Majlisi Senati Raisi Tanzila Norboyeva Rossiya Senati raisi Valentina Matviyenko bilan telefon orqali muloqot qildi.
Parlament yuqori palatasi ma’lumotiga ko‘ra, muloqot chog‘ida tomonlar parlamentlararo munosabatlar, shuningdek, o‘zaro hamkorlikning yangi yo‘nalishlarini qamrab oladigan O‘zbekiston—Rossiya aloqalarni mustahkamlash masalalariga urg‘u berdi.
13—15-oktabr kunlari Sankt-Peterburgda bo‘lib o‘tgan uchinchi Yevrosiyo ayollar forumi yakunlari va rossiyalik senatorlarning O‘zbekiston Prezidenti saylovini kuzatish missiyalari tarkibidagi, shu jumladan, MDH Parlamentlararo assambleyasidan xalqaro kuzatuvchilar guruhidagi faoliyati yakunlari muhokama etildi.
Rossiyalik kuzatuvchilarning O‘zbekiston Prezidenti saylovida xalqaro kuzatuvchi sifatida faol ishtirok etgani uchun minnatdorlik bildirildi.
Shuningdek, tomonlar Toshkent shahrida bo‘lib o‘tgan hamda mehnat migratsiyasi, ta’lim va parlamentlararo hamkorlikni chuqurlashtirish masalalari muhokama etilgan O‘zbekiston Oliy Majlisi Senati va Rossiya Federal Majlisi Federatsiya Kengashi o‘rtasidagi hamkorlik bo‘yicha Parlamentlararo komissiyaning oltinchi majlisi yakunlarini yuqori baholadi.
Ikki mamlakat o‘rtasidagi ishonchli va muntazam muloqot ko‘p qirrali hamkorlikni rivojlantirishda muhim ahamiyat kasb etishi ta’kidlandi.
Izoh (0)