Qashqadaryoda foydalanishga topshirilganiga hali bir yil ham bo‘lmagan Qarshi city’dagi ko‘p qavatli uyda ichimlik suvi bilan bog‘liq muammo borligi ma’lum bo‘ldi. Bu haqda “Daryo”ga viloyat uy-joy kommunal xizmat ko‘rsatish boshqarmasi axborot xizmati rahbari O‘lmas Baratov ma’lum qildi.
Qayd etilishicha, ijtimoiy tarmoqlarda Qarshi city’dagi uylarning yerto‘lasidagi quvurlardan suv sizib chiqayotgani va aholiga noqulaylik tug‘dirayotgani haqida xabar tarqalgan.
“Qarshi shahar ‘Navo’ mahallasi hududida qurilgan yangi 3 ta 16 qavatli uy quruvchi tashkilot Agromir building MChJ tomonidan 2021-yil boshida aholiga foydalanishga topshirilgan. Qarshi city’dagi 12-sonli ko‘p qavatli uyning yerto‘la qismida o‘rnatilgan 10 tonna sig‘imli ichimlik suv bakida nosozliklar aniqlanib, quruvchi hamda boshqaruv tashkilot tomonidan aniqlangan nosozliklarni bartaraf etish maqsadida yerto‘la qismida yig‘ilib qolgan suv maxsus nasos orqali tortib olinib, yerto‘la qismini quritish ishlari olib borilmoqda”, — deydi O‘lmas Baratov.
Mas’ul boshqarma axborot xizmati rahbarining qo‘shimcha qilishicha, suv bilan bog‘liq muammo yuzaga kelgach, aholi ko‘p qavatli uyning yerto‘la qismida joylashgan qo‘shimcha bak orqali ichimlik suvi bilan ta’minlanmoqda.
“Agromir building MCHJ tomonidan ichimlik suv bakida aniqlangan nosozliklarni bartaraf etish choralari ko‘rilmoqda. Bundan tashqari, mazkur ko‘p qavatli uylarning kirish yo‘lak qismiga o‘rindiqlar o‘rnatish ishlari hamda mavjud boshqa kamchiliklarni ham bartaraf etish choralari ko‘rilayotganini ma’lum qilamiz”, — deydi O‘lmas Baratov.
Izoh (0)