Қашқадарёда фойдаланишга топширилганига ҳали бир йил ҳам бўлмаган Qarshi city’даги кўп қаватли уйда ичимлик суви билан боғлиқ муаммо борлиги маълум бўлди. Бу ҳақда «Дарё»га вилоят уй-жой коммунал хизмат кўрсатиш бошқармаси ахборот хизмати раҳбари Ўлмас Баратов маълум қилди.
Қайд этилишича, ижтимоий тармоқларда Qarshi city’даги уйларнинг ертўласидаги қувурлардан сув сизиб чиқаётгани ва аҳолига ноқулайлик туғдираётгани ҳақида хабар тарқалган.
«Қарши шаҳар ‘Навo’ маҳалласи ҳудудида қурилган янги 3 та 16 қаватли уй қурувчи ташкилот Agromir building МЧЖ томонидан 2021 йил бошида аҳолига фойдаланишга топширилган. Qarshi city’даги 12-сонли кўп қаватли уйнинг ертўла қисмида ўрнатилган 10 тонна сиғимли ичимлик сув бакида носозликлар аниқланиб, қурувчи ҳамда бошқарув ташкилот томонидан аниқланган носозликларни бартараф этиш мақсадида ертўла қисмида йиғилиб қолган сув махсус насос орқали тортиб олиниб, ертўла қисмини қуритиш ишлари олиб борилмоқда», — дейди Ўлмас Баратов.
Масъул бошқарма ахборот хизмати раҳбарининг қўшимча қилишича, сув билан боғлиқ муаммо юзага келгач, аҳоли кўп қаватли уйнинг ертўла қисмида жойлашган қўшимча бак орқали ичимлик суви билан таъминланмоқда.
«Agromir building МЧЖ томонидан ичимлик сув бакида аниқланган носозликларни бартараф этиш чоралари кўрилмоқда. Бундан ташқари, мазкур кўп қаватли уйларнинг кириш йўлак қисмига ўриндиқлар ўрнатиш ишлари ҳамда мавжуд бошқа камчиликларни ҳам бартараф этиш чоралари кўрилаётганини маълум қиламиз», — дейди Ўлмас Баратов.
Изоҳ (0)