Россия Ички ишлар вазирлиги томонидан ишлаб чиқилган Россия ва Ўзбекистон ўртасидаги келишувни ратификация қилиш тўғрисидаги қонун лойиҳасида икки давлат фуқаролари ўзаро мамлакатлар ҳудудига кирган кундан бошлаб 15 кун ичида рўйхатдан ўтиш заруратидан озод этилиши кўзда тутилмоқда. Бу ҳақда Ташқи меҳнат миграцияси агентлиги хабар берди.
Россия фуқароларининг Ўзбекистон ҳудудида ва Ўзбекистон фуқароларининг Россия ҳудудида бўлиш тартиби тўғрисидаги ҳукуматлараро келишув 2021 йилнинг 21 май куни Москвада ва 17 июнь куни Тошкентда имзоланган.
Аввалроқ Россия ҳукумати 150 минг ўзбекистонлик муҳожирнинг мамлакатга киришига қўйилган тақиқни олиб ташлагани, Россияда ўзбекистонлик меҳнат мигрантларини ишга жалб этиш тартиби соддалаштирилиши, Россия Ички ишлар вазирлиги меҳнат мигрантлари учун электрон патентларни жорий этиш режаларини эълон қилгани тўғрисида хабар берилганди.
Мавзуга доир: «Мигрантлар — фидойи фарзандларим». Шавкат Мирзиёев мигрантлар даромадини солиққа тортиш бўйича ўз позициясини маълум қилди
Ўша йилнинг декабрида Ўзбекистон Ташқи меҳнат миграцияси агентлиги ва Россия Паспорт-виза хизмати ҳамда Москва шаҳрининг Кўп тармоқли миграция маркази ўртасида ҳамкорлик тўғрисида келишувлар имзоланди. Ушбу ҳужжат Россияда меҳнат қилиш истагида бўлган Ўзбекистон фуқароларини ташкиллаштирилган ҳолда чиқиш жараёнларини соддалаштириши айтилганди.
Изоҳ (0)