Seulda Janubiy Koreya Interpol xodimlari xalqaro qidiruvda bo‘lgan O‘zbekiston fuqarosini chegara postini kesib o‘tish vaqtida qo‘lga oldi. Bu haqda Interpolning O‘zbekistondagi Milliy markaziy byurosi xabar berdi.

Ma’lum qilinishicha, qo‘lga olingan Yu.U. Jinoyat kodeksining 168-moddasiga (firibgarlik) asosan, katta miqdordagi firibgarlik jinoyatini sodir etgani uchun O‘zbekiston huquqni muhofaza qilish organlari tomonidan Interpol kanallari orqali qidiruvga berilgan bo‘lgan.

Yu.U. Janubiy Koreya hududida bo‘la turib, O‘zbekiston firmalari birining vakili bo‘lgan fuqaro Yu.I.ning ishonchiga kirib, mamlakatda ishlash uchun odam topib berishini taklif qilgan.

Fuqaro Yu.I. chet davlatda ishlashni istaganlarni topib, ular banklar orqali fuqaro Yu.U.ning hisob raqamiga  507,7 million so‘m (54,6 ming dollar) o‘tkazib yuborgan. Evaziga esa u Janubiy Koreyada ishlash uchun taklifnomagina jo‘natib turgan, shundan so‘ng noma’lum joyda yashirinib yurgan.

Hozirda uni O‘zbekistonga ekstraditsiya qilish choralari ko‘rilmoqda.

Avvalroq O‘zbekistonda firibgarlik sodir etgani uchun xalqaro qidiruvda bo‘lgan ikki fuqaro Janubiy Koreyadan ekstraditsiya qilingani to‘g‘risida xabar berilgandi.