O‘zbekistonda prezidentlik saylovi bo‘lib o‘tayotgan kun — 2021-yilning 24-oktabr kuni turmush qurishni niyat qilgan va saylovda ishtirok etgan kelin-kuyovlar ham uchradi, deya xabar bermoqda “Daryo” muxbiri.
Xususan, Qashqadaryo viloyatining Yakkabog‘ hamda Kasbi tumanlarida, Surxondaryo viloyatining Sherobod hamda Angor tumanlarida bo‘lajak juftliklar saylov jarayonlarida ishtirok etgan.
“Kasbi tumanidagi 428-saylov uchastkasida kelin-kuyov Bekzod Boyqorayev hamda Dilnoza Soipova, 448-saylov uchastkasida Abdurauf Haqqiyev va Setora Majidova o‘z konstitutsion huquqlaridan foydalanib, yorqin kelajagi uchun o‘zlari munosib deb bilgan nomzodga ovoz berdi”, — deydi tuman hokimligi axborot xizmati rahbari Gulilaylo Tugalova.
Viloyatning Yakkabog‘ tumanidagi 930-saylov uchastkasida esa Shahboz Turdiyev hamda Sadoqat Ne’matova juftligi ishtirok etib, oila kelajagi uchun munosib nomzodga ovoz bergan.
AOKAning Surxondaryo viloyati boshqarmasi boshlig‘i Zahiriddin To‘rayevning “Daryo”ga ma’lum qilishicha, viloyatning Sherobod tumanida bir vaqtning o‘zida uchta juftlik saylov uchastkalarida bo‘lib, fuqarolik huquqlaridan foydalangan.
“Sherobod tumanidagi 90-saylov uchastkasida Baxtibek Mirzayev hamda Mahliyo Mamatqobilova juftligi ovoz bergan bo‘lsa, 107-saylov uchastkasida Shahboz Qarshiyev va Aziza Ismoilova, 65-saylov uchastkasida esa Fayzulla Rashanov hamda uning bo‘lajak turmush o‘rtog‘i Madina Ismoilova o‘zlariga ma’qul nomzodga ovoz berdi”, — deydi Zahiriddin To‘rayev.
Zahiriddin To‘rayevning qo‘shimcha qilishicha, saylov kuni viloyatning Angor tumanida yashovchi, tumandagi maktablarning birida rus tili fanidan dars beruvchi Sardor Mahmudovning ham to‘yi bo‘lib o‘tmoqda. U bo‘lajak turmush o‘rtog‘i Madina Halilova bilan birga tumandagi 130-saylov uchastkasida fuqarolik huquqidan foydalangan.
“Daryo” muxbiri Azizbek Abduvaliyevning ma’lum qilishicha, Namanganda prezidentlik saylovi arafasida nikohdan o‘tgan bir necha juft yoshlar ham saylov uchastkalariga ovoz berish uchun keldi.
“Jumladan, To‘raqo‘rg‘on tumanidagi ‘Kalvak’ mahallasida yashovchi G‘iyosovlar xonadonida shunday qo‘shaloq voqea yuz berdi. Abdurahmon va Shahnoza G‘iyosova to‘yning ertasiga saylov uchastkasiga keldi. Bu yerda hatto o‘ziga xos kelinsalom ham bo‘lib o‘tdi. Ovoz berish uchun kelgan keksalar ikki yoshga baxt tilab, duo qildi”, — deydi muxbir.
Chortoq tumanining “Yangiobod” mahallasida yashovchi Ilhomjon Usmonov ham saylov uchastkasiga kuni-kecha turmush qurgan rafiqasi Madinaxon bilan birga kelib, o‘zlari munosib deb bilgan nomzod uchun ovoz berdi.
Shu tumandagi “Dildosh” mahallasida yashovchi Xursandbek Bahriddinov ham kelin Shahzodaxon bilan birga saylov uchastkasiga kelib, saylovda ishtirok etdi. “To‘y bilan bo‘lib fuqarolik burchimizni ham unutib qo‘ymasligimiz kerak”, — deydi Xursandbek.
Ma’lumot uchun, 24-oktabr kuni soat 08:00 da boshlangan prezident saylovi soat 20:00 da qadar yakunlandi. Biroq vaqt mintaqasini hisobga olgan holda, ovoz berish jarayoni AQSh va Yevropa mamlakatlarida davom etmoqda. Dastlabki natijalar 25-oktabr kuni e’lon qilinadi.
Izoh (0)