Ўзбекистонда президентлик сайлови бўлиб ўтаётган кун — 2021 йилнинг 24 октябрь куни турмуш қуришни ният қилган ва сайловда иштирок этган келин-куёвлар ҳам учради, дея хабар бермоқда «Дарё» мухбири.
Хусусан, Қашқадарё вилоятининг Яккабоғ ҳамда Касби туманларида, Сурхондарё вилоятининг Шеробод ҳамда Ангор туманларида бўлажак жуфтликлар сайлов жараёнларида иштирок этган.
«Касби туманидаги 428-сайлов участкасида келин-куёв Бекзод Бойқораев ҳамда Дилноза Соипова, 448-сайлов участкасида Абдурауф Ҳаққиев ва Сетора Мажидова ўз конституцион ҳуқуқларидан фойдаланиб, ёрқин келажаги учун ўзлари муносиб деб билган номзодга овоз берди», — дейди туман ҳокимлиги ахборот хизмати раҳбари Гулилайло Тугалова.
Вилоятнинг Яккабоғ туманидаги 930-сайлов участкасида эса Шаҳбоз Турдиев ҳамда Садоқат Неъматова жуфтлиги иштирок этиб, оила келажаги учун муносиб номзодга овоз берган.
АОКАнинг Сурхондарё вилояти бошқармаси бошлиғи Заҳириддин Тўраевнинг «Дарё»га маълум қилишича, вилоятнинг Шеробод туманида бир вақтнинг ўзида учта жуфтлик сайлов участкаларида бўлиб, фуқаролик ҳуқуқларидан фойдаланган.
«Шеробод туманидаги 90-сайлов участкасида Бахтибек Мирзаев ҳамда Маҳлиё Маматқобилова жуфтлиги овоз берган бўлса, 107-сайлов участкасида Шаҳбоз Қаршиев ва Азиза Исмоилова, 65-сайлов участкасида эса Файзулла Рашанов ҳамда унинг бўлажак турмуш ўртоғи Мадина Исмоилова ўзларига маъқул номзодга овоз берди», — дейди Заҳириддин Тўраев.
Заҳириддин Тўраевнинг қўшимча қилишича, сайлов куни вилоятнинг Ангор туманида яшовчи, тумандаги мактабларнинг бирида рус тили фанидан дарс берувчи Сардор Маҳмудовнинг ҳам тўйи бўлиб ўтмоқда. У бўлажак турмуш ўртоғи Мадина Ҳалилова билан бирга тумандаги 130-сайлов участкасида фуқаролик ҳуқуқидан фойдаланган.
«Дарё» мухбири Азизбек Абдувалиевнинг маълум қилишича, Наманганда президентлик сайлови арафасида никоҳдан ўтган бир неча жуфт ёшлар ҳам сайлов участкаларига овоз бериш учун келди.
«Жумладан, Тўрақўрғон туманидаги ‘Калвак’ маҳалласида яшовчи Ғиёсовлар хонадонида шундай қўшалоқ воқеа юз берди. Абдураҳмон ва Шаҳноза Ғиёсова тўйнинг эртасига сайлов участкасига келди. Бу ерда ҳатто ўзига хос келинсалом ҳам бўлиб ўтди. Овоз бериш учун келган кексалар икки ёшга бахт тилаб, дуо қилди», — дейди мухбир.
Чортоқ туманининг «Янгиобод» маҳалласида яшовчи Илҳомжон Усмонов ҳам сайлов участкасига куни-кеча турмуш қурган рафиқаси Мадинахон билан бирга келиб, ўзлари муносиб деб билган номзод учун овоз берди.
Шу тумандаги «Дилдош» маҳалласида яшовчи Хурсандбек Баҳриддинов ҳам келин Шаҳзодахон билан бирга сайлов участкасига келиб, сайловда иштирок этди. «Тўй билан бўлиб фуқаролик бурчимизни ҳам унутиб қўймаслигимиз керак», — дейди Хурсандбек.
Маълумот учун, 24 октябрь куни соат 08:00 да бошланган президент сайлови соат 20:00 да қадар якунланди. Бироқ вақт минтақасини ҳисобга олган ҳолда, овоз бериш жараёни АҚШ ва Европа мамлакатларида давом этмоқда. Дастлабки натижалар 25 октябрь куни эълон қилинади.
Изоҳ (0)