Олий Мажлис Сенати адлия вазири билан дебатга сабаб бўлган қонуннинг рад этилишига расмий муносабат билдирди

Олий Мажлис Сенати йигирманчи ялпи мажлисида муҳокама қилинган «Ижтимоий тадбиркорлик тўғрисида»ги қонун ва унинг сенаторлар томонидан рад этилиши айрим ижтимоий тармоқларда турли фикрларни келтириб чиқараётгани юзасидан расмий муносабат билдирди.

Сенатнинг йигирманчи ялпи мажлисида сенаторлар «Ижтимоий тадбиркорлик тўғрисида»ги қонуннинг баъзи нормаларини қайта кўриб чиқиш керак деб ҳисоблаб, уни қайтарган эди. Адлия вазири Русланбек Давлетов сенаторларнинг қонунни қабул қилишга қарши билдирган ҳар бир аргументини рад этиб, айрим сиёсатчилар «халқдан келиб чиқаётган янги ғояларни тушунмаслигини» таъкидлаганди. Оқибатда Сенат раиси узоқ давом этган дебатга аралашишга ва томонларни тинчлантиришга мажбур бўлганди.

Муносабатда қайд этилишича, сенаторлар муҳокамага қўйилган барча қонунларни шунчаки кўр-кўрона маъқуллаб юборавермайди, ҳар бир ҳужжат ялпи мажлисгача жуда кўп чиғириқлардан ўтади. Экспертлар кенгаши жалб қилиниб, дастлабки тарзда қўмиталарда кўриб чиқилади. Қонун ташаббускорлари ҳам бу жараёнда бевосита иштирок этади. Қолаверса, халқ вакиллари жойига чиққан ҳолда мавжуд ҳолатни ўрганади. Ана шулардан кейингина рад этишга тўла ишонч ҳосил қилинса, қонун қайтарилади.

Таъкидланишича, баъзи ижтимоий тармоқлар фойдаланувчилари мана шу ҳолатларни атрофлича ҳисобга олмаган ҳолда, бир ёқлама қараш орқали сенаторларни ижтимоий тадбиркорлик нималигини тушунмасликда айблаши, «шекилли», «шунақага ўхшайди» деган тахминий хулосалар билан улар фаолиятига баҳо бериши — бу профессионалларга хос бўлмаган ёндашув ҳисобланади. «Чунки парламент юқори палатаси аъзолари турли соҳаларни, ҳуқуқий, ижтимоий-сиёсий, иқтисодий жараёнларни яхши биладиган етук, малакали мутахассислардир. Шу боис ташқаридан туриб, қонуннинг мазмун-моҳиятидан яхши хабардор бўлмаган ҳолда баҳо бериш, шахсиятга йўналтирилган фикрларни айтиш ахлоқий ва ҳуқуқий жиҳатдан ҳам тўғри эмас», — дея қайд этилади хабарда.

Ўз навбатида, Олий Мажлис Сенати ижтимоий ҳимояга қарши деган фикрга борилмаслик сўралган:

Маълум қилинишича, тез орада Тадбиркорлик кодекси қабул қилинади, барча тадбиркорлар битта, ягона қонун асосида иш олиб боради — ана шунда кўпгина масалалар яна ўз ечимини топади.

«Умуман айтганда, рад этилган қонун яна кўриб чиқилади. Маромига етгач, Олий Мажлис Сенатининг навбатдаги ялпи мажлисида муҳокама қилинади. У қўллаб-қувватланса, маъқулланади. Шу боис журналист ва блогерлардан ортиқча ҳис-ҳаяжонга берилмай, вазиятни тўғри баҳолаб, холис муносабат билдиришларини сўраб қоламиз. Агар улар ‘Ижтимоий тадбиркорлик тўғрисида’ги қонунни қайта ишлаш жараёнида бевосита қатнашишни истасалар, марҳамат, Сенат бу борада ҳам уларга имконият яратиб беришга тайёр», — дейилади муносабатда.

Аввалроқ Ўзбекистон Ногиронлар жамияти раиси, Карлар жамияти раиси ва Кўзи ожизлар жамияти раиси сенаторлар томонидан «Ижтимоий тадбиркорлик тўғрисида»ги қонуннинг қайтарилиши юзасидан мурожаат билан чиққанди. Мурожаатда таъкидланишича, сенаторлар қонунни рад этгани «бошқалар билан эркин рақобатлаша олмайдиган имконияти табиатан чекланган шахслар учун жуда кутилмаган ҳолат бўлган».