Janubiy Koreya harbiylari ma’lumotlariga ko‘ra, KXDR suvosti kemalari uchun mo‘ljallangan ballistik raketani sinovdan o‘tkazgan, deb yozadi Meduza.
Raketa Yapon dengizida, Shimoliy Koreyaning Sinpxo shahri yaqinida uchirilgan. Janubiy Koreya Mudofaa vazirligi raketa suvosti kemasidan uchirilgani yoki sinov parvozi dengiz platformasidan amalga oshirilgani yuzasidan hozircha ma’lumotlarga ega emas.
KXDR tomonidan o‘tkazilgan raketa sinovlari haqida Yaponiya Mudofaa vazirligi ham xabar bergan. Yaponiya harbiylariga ko‘ra, ikkita raketa uchirilgan, qolgan tafsilotlar ochiqlanganicha yo‘q.
Suvosti kemalari uchun mo‘ljallangan ballistik raketa sinovi AQSh tomonidan KXDRga qarata Shimoliy Koreya dasturi bo‘yicha muzokaralar o‘tkazishga oid navbatdagi da’vat jaranglaganidan keyin ko‘p o‘tmay o‘tkazildi. Associated Press qayd etishicha, raketa otilishi muzokaralar jarayoni hozircha pauzaga qo‘yilganini va Shimoliy Koreya qurol-yarog‘larini kuchaytirishda davom etayotganini namoyish qiladi.
KXDR tomonidan ballistik raketa uchirilgach, Janubiy Koreya Milliy xavfsizlik kengashi “chuqur afsus” bildirdi va Pxenyanni sulh bo‘yicha muzokaralarga qaytishga chaqirdi.
Shimoliy Koreyaga nisbatan e’lon qilingan xalqaro sanksiyalar, shu jumladan, yadro o‘qini tashishga qodir raketalar ishlab chiqish va sinash jarayonlariga ham aloqadordir. KXDRga nisbatan o‘z sanksiyalarini AQSh ham kiritgan. KXDR bilan xalqaro ko‘mak va sanksiyalarning yumshatilishi evaziga yadro dasturi va raketa sinovlaridan voz kechish haqida muzokaralar o‘tkazishga bir necha marta urinib ko‘rishgan. Hozircha kelishuvlarga uzoq muddatli rioya qilinishiga erishilgani yo‘q.
Avvalroq Shimoliy Koreya yangi turdagi zenit raketasini sinovdan o‘tkazganini ma’lum qilgandi. Sinovlar 30-sentabr kuni KXDR Mudofaa fanlari akademiyasi tomonidan o‘tkazilgan
28-sentabr kuni Shimoliy Koreya mamlakat tarixida birinchi marta gipertovushli raketa uchirgandi. KXDR ma’lum qilishicha, “Xvason-8” deb nomlangan ushbu turdagi raketa sinovlari muvaffaqiyatli o‘tgan. Shuningdek, o‘sha kuni Janubiy Koreya shtab boshliqlari qo‘mitasi KXDR Yapon dengizi tomon kamida bitta raketa uchirganini ma’lum qildi. Kyodo manbalariga ko‘ra, bu qisqa masofali ballistik raketa bo‘lgan.
Undan avval KXDR 15 va 13-sentabr kunlari raketa uchirgani haqida xabar berilgan. O‘shanda Shimoliy Koreya hukumati raketalar mamlakatning yangilangan mudofaa strategiyasi doirasida sinovdan o‘tkazilganini aytgan.
Yaponiya bosh vaziri Yosixide Suga KXDR faoliyatini o‘z mamlakati va butun mintaqa uchun tahdid deb atadi. 26-sentabr kuni BMT bosh kotibi Antonio Guterrish insoniyat yadro qurollari sababli yo‘q bo‘lib ketish yoqasida turganini ta’kidladi.
Shimoliy Koreyaning BMTdagi vakili esa KXDR AQSh va Janubiy Koreya xavfsizligini hech qachon buzmasligini va’da qildi.
Izoh (0)