2021-yilda Italiyaning Gucci modalar uyi o‘zining 100 yilligini nishonlamoqda. Shu munosabat bilan brend Amerikaning o‘yinchoq ishlab chiqaruvchi Mattel kompaniyasi bilan hamkorlikda Hot Wheels lineykasiga kiruvchi o‘yinchoq avtomobilni taqdim etdi. 1982-yilga taalluqli Cadillac Seville modelining 1:64 masshtabdagi nusxasi 18-oktabrdan 120 dollar qiymatida sotuvga chiqdi, deb xabar beradi Motor.
Cadillac Seville kichraytirilgan nusxasining orqa tom qismi Gucci’ning ikkitali G harfidan iborat naqshlari bilan bezatilgan, o‘rindiqlariga tilla rangli bezaklar tushirilgan. Mashina eksklyuziv quti va modalar uyining nomidagi g‘ilofda yetkazib beriladi. Uni Mattel va Gucci saytlari orqali, shuningdek, modalar uyining Nyu-York, Pekin, Seul, Tokio, Milan, London va Berlindagi do‘konlaridan xarid qilish mumkin.
Gucci brendi Amerika avtomobilsozlik kompaniyasi bilan bundan oldin ham hamkorlik qilgan — bu kabi kollabratsiyaning birinchi mevasi 1972-model yiliga kiruvchi AMC Hornet xetchbeki bo‘lgan. Uning saloni turli ranglar bilan qoplangan: old o‘rindig‘i fil suyagi, yashil va qizil rangda bo‘lsa, shift qismi — fil suyagi va yashil rangga bo‘yalgan, gilamchalar to‘q yashil rangda.
Modelning, shuningdek, interyeri ham ikkitali G harfidan iborat naqshlar bilan bezatilgan. Shundan so‘ng Italiya brendi Mayamidagi International Automotive Design (IAD) atelyesi hamkoriga aylangan va 1978-yilgi model qatoridan o‘rin olgan Cadillac Seville’ni jihozlash bilan shug‘ullangan. Ularni oq, qora yoki jigarrang ranglarda xarid qilish mumkin edi. Mashina kuzoviga Cadillac emblemasi o‘rniga Gucci’ning tillarang emblemasi tushirilgan, interyeri jigarrang charm bilan qoplangan. O‘sha vaqtda Seville Gucci Edition 22,9 ming dollardan sotilgan, bu hozirda qariyb 95 ming dollarga ekvivalent hisoblanadi.
Avvalroq Louis Vuitton velosipedlar kolleksiyasini taqdim etgani va ularning narxi 27 ming dollardan boshlanishi, Dior brendi qushlardan ilhomlanilgan yangi soat modelini taqdim qilgani to‘g‘risida xabar berilgandi.
Izoh (0)