Porsche kompaniyasi 3D printer yordamida tayyorlangan avtomobil o‘rindiqlari savdosini yo‘lga qo‘ydi. Sinovchi-haydovchilar bilan amalga oshirilgan qator testlardan so‘ng, o‘rindiqlar Porsche Tequipment’ning Performance Parts katalogiga kiritilgan. Hozirda uning Boxster, Cayman va 911 uchun turli versiyalari mavjud, deb xabar beradi Motor.
O‘rindiqlarning asosiy o‘ziga xosligi — markaziy qismi, yostiqcha va suyanchig‘i 3D printer yordamida tayyorlangan. O‘rindiqlar xuddi professional avtosportdagi kabi haydovchining xohishiga qarab moslashishi uchun ushbu elementlar uch darajadagi qattiqlikka ega. Porsche’ning sinovchi-haydovchisi Lars Kernning ta’kidlashicha, ergonomika va qo‘llab-quvvatlash nuqtai nazaridan u rostdan ham poyga avtomobillari “kovshi”ga yaqin hisoblanadi.
O‘rindiq asosini ko‘pikli polipropilen (EPP) tashkil etadi, yuqori qismi 3D printerda poliuretan asosli material qotishmasidan bosib chiqarilgan. Qatlamlar yelimdan foydalanilmagan holda birlashtiriladi. Tashqi qoplamasi sirpanmaydigan Race-Tex materiallaridan ishlangan. Porsche’dagilarning so‘zlariga ko‘ra, bu kabi o‘rindiq oddiysidan sakkiz foizga yengilroq.
Hozirda o‘rindiqlar uch xil rangda taqdim etilmoqda — qora, qizil va sariq, 2022-yilning fevralidan boshlab Arctic Grey kulrangi hamda Ultramarine va Shark Blue ko‘k ranglari qo‘shiladi. Yangi o‘rindiq Porsche’ning kovshsimon kreslolar bilan jihozlangan barcha modellariga mos keladi, xususan, ham haydovchi, ham old yo‘lovchi joyi uchun. Bu kabi “chop etilgan” bitta o‘rindiqning narxi 2677,5 yevroni tashkil etadi va uni Porsche markazlarida bir necha daqiqa ichida almashtirish mumkin.
Avvalroq AQShda 3D printer yordamida noyob elektrovelosiped yaratilgani, Xitoyda “Formula-1” bolidining ishlaydigan uzatmalar qutisi 3D printer yordamida chop etilgani to‘g‘risida xabar berilgandi.
Izoh (0)