“Shalpangquloq” ortidan quvib: Chempionlar Ligasining asosiy favoritlari haqida

Chempionlar Ligasi yangi mavsumining guruh bosqichi 14-sentabr kuni start oldi. Dastlabki tur o‘yinlaridanoq tomoshabinlar (jamoalar ham) ko‘plab qiziqarli qarama-qarshiliklarga guvoh bo‘ldi, oldinda esa o‘yinlar talaygina. Shunday ekan, Yevropaning klublar o‘rtasidagi eng nufuzli musobaqasida qaysi jamoalarning imkoniyati yuqori ekanligi haqida fikr yuritishning ayni vaqti.

“Manchester Siti”

“Manchester Siti” ketma-ket uch mavsum davomida Chempionlar Ligasidagi ishtirokini chorak final bosqichida yakunlagan. O‘tgan mavsumda esa “shaharliklar” o‘zlari uchun qayg‘uli bosqichni yengib o‘tdi va musobaqa finaliga qadar yetib borishga muvaffaq bo‘ldi. Pley-off bosqichida Xosep Gvardiola shogirdlari avvaliga “Borrussiya Myonxengladbax”ni, keyinchalik esa “Borussiya Dortmund”ni taslim etdi, yarim final bosqichida esa “PSJ” dog‘da qoldirildi. Biroq jamoa musobaqaning hal qiluvchi o‘yinida “Chelsi”ga minimal hisobda imkoniyatni boy berib qo‘ydi. Shu tariqa “shaharliklar” Manchesterning moviy qismi orzusini amalga oshirishga juda yaqin kelgandi, ammo londonlik raqiblar bunga to‘sqinlik qildi.

“Siti” bu mavsumda ham yana Chempionlar Ligasida asosiy favorit bo‘lishiga shubha yo‘q. Manchester klubi hamon musobaqada g‘olib bo‘lish g‘oyasidan voz kechmayapti va bu maqsadga erishish yo‘lida hech narsani tejamayapti. “Manchester Siti” garchi bu mavsum oldidan markaziy hujumchini o‘z safiga qo‘shib ololmagan bo‘lsa-da, “Aston Villa”dan Jek Grilishni 100 million funtga xarid qilib, Angliya Premyer Ligasi tarixidagi eng qimmat transferni amalga oshirdi. Dastlabki bahslarda Grilish o‘zining eng yaxshi o‘yinlarini ko‘rsata olmayotgan bo‘lsa ham, Gvardiolada hali undan maksimal darajada foydalanish uchun vaqt bo‘ladi. Boshqa pozitsiyalarda esa “Manchester Siti” yaxshi shakllangan va tartibli o‘yinchilarga ega. Shunday ekan, jamoa “shalpangquloq” uchun kurashish uchun barcha imkoniyatlarga ega.

“Chelsi”

Tomas Tuxel “Chelsi” boshqaruvini qabul qilib olganda, juda kamchilik uni jamoani bu darajada o‘zgartirib yuboradi deb o‘ylagan bo‘lsa kerak. Ammo germaniyalik mutaxassis qisqa vaqt ichida jamoani yaxshi tarafga o‘zgartirib, “ko‘klar”ni APLda kuchli to‘rtlikka qaytargan bo‘lsa, Chempionlar Ligasida bosh sovrinni qo‘lga kiritdi. Londonliklar pley-off bosqichida “Atletiko M”, “Portu” va “Real” to‘sig‘idan o‘tdi. Final uchrashuvida “aristokratlar” “Manchester Siti”ni mag‘lub etdi, nufuzli musobaqaning final o‘yinida g‘alaba qozonish uchun 1 ta gol kifoya qildi. Bundan tashqari, jamoa joriy mavsumda boshida UEFA Superkubogini ham qo‘lga kiritdi. Shunday ekan, “Chelsi”ning Chempionlar Ligasi asosiy favoriti ekanligiga hech qanday shubha bo‘lmasligi kerak.

“Chelsi”da yosh, ammo yaxshi shakllangan tarkib yig‘ilgan. Jamoa, shuningdek, katta g‘alabalarni tatib ko‘rishga ham ulgurgan. Tuxel jamoasi shu bilan to‘xtamoqchi emas. Qolaversa, londonliklar yangi mavsum oldidan ajoyib transferlarni amalga oshirdi. “Inter”dan Romelu Lukaku qaytarildi. Belgiyalik hujumchi darhol jamoaga moslashib oldi va gollar ura boshladi. Bundan tashqari, “Chelsi” “Atletiko” yarim himoyachisi Saul Nigesni ijaraga oldi. Ispaniyalikning transferi ham, shubhasiz, “ko‘klar”ga barcha musobaqalarda asqatadi. Rivojlanishdan to‘xtamayotgan London jamoasi shu ketishda davom etsa, katta yutuqlar seriyasini qo‘lga kiritish ehtimoli juda yuqori.

“Bavariya”

Myunxen klubi o‘zi ishtirok etadigan har qanday musobaqaning favoritlari qatorida tilga olinib keladi. Bundan tashqari “Bavariya” o‘tgan mavsumdagi (YChLda) muvaffaqiyatsiz o‘yinlari tufayli bu yilda har qachongidan ham yaxshiroq harakat qilishga urinadi. “Bavariya” o‘shanda chorak final bosqichidayoq o‘z ishtirokini yakunlagandi. Myunxenliklar 1/8 finalda “Latsio”ni yenggan, lekin 1/4 finalda “PSJ”ga duch kelib, ikki o‘yin natijasiga ko‘ra yarim finalga parijliklarni kuzatib qo‘yishga majbur bo‘lgandi.

“Rekordmayster” ilk turdagi “Borussiya M”ga qarshi durangni hisobga olmaganda, Bundesliganing yangi mavsumini yomon boshlamadi. Bundan tashqari, avgust oyida jamoa Germaniya Superkubogini qo‘lga kiritdi. Ortda qolgan turlarda ko‘rindiki, bu mavsumda ham “Bavariya”ga Bundesligada chempion bo‘lish ortiqcha qiyinchilik tug‘dirmaydi. Bu esa “Bavariya”ning Chempionlar Ligasiga alohida e’tibor qaratishi va muvaffaqiyat qozonish uchun barcha imkoniyatlarni ishga solishini anglatadi.

“PSJ”

Chempionlar Ligasi — “PSJ” uchun asosiy musobaqa hisoblanishi hech kimga sir emas. Parijliklar buni hech qachon yashirmagan va musobaqada g‘olib chiqish asosiy maqsadi ekanini ochiq aytib keladi. Ammo hozircha buning uddasidan chiqish jamoaga nasib etmayapti. Parijliklar 2019/20-yilgi mavsumda bu maqsadiga juda yaqin kelgandi, lekin final uchrashuvida “Bavariya”ga minimal hisobda imkoniyat boy berilgandi. Eng alamlisi, g‘alaba golini klub tarbiyalanuvchisi Kingsli Koman urgandi. O‘tgan mavsumda parijliklar “Bavariya”dan revansh olganiga qaramay, yarim finalda “Manchester Siti”ga yutqazib qo‘ydi va musobaqa bilan xayrlashdi. Joriy mavsumda ham jamoa musobaqaning asosiy favoritlari qatorida ko‘rsatilmoqda.

“PSJ” o‘tgan yozda tarkibni kuchaytirish borasida aqlbovar qilmas darajadagi ishlarni amalga oshirdi. Parijga Lionel Messi erkin agent sifatida olib kelindi. Bundan tashqari, Jorjinyo Veynaldum, Janluiji Donnarumma, Serxio Ramos va Ashraf Hakimi “PSJ”da to‘p suradigan bo‘ldi. Shuningdek, Neymar va Kilian Mbappe “Park de Prens”da qoldi. Shu tariqa “PSJ”da jahon darajasidagi yulduzlar jamlandi, ammo parijliklarning yangi galaktikosga aylana olishiga hali kafolat yo‘q. Liga 1 Pochettino jamoasi uchun katta muammo tug‘dirmasligi aniq, lekin Chempionlar Ligasi haqida bunday deb bo‘lmaydi. Boisi bu mutlaqo boshqa darajadagi musobaqa bo‘lib, u yerda ko‘p narsa nafaqat futbolchilar va ularning mahoratiga, balki murabbiyning taktikasiga ham bog‘liq. Ha, nazariy jihatdan qaralsa, parijliklar Chempionlar Ligasida g‘olib chiqish uchun eng yaxshi imkoniyatga ega, biroq so‘nggi o‘yinlar jamoada hali qilinishi kerak bo‘lgan ishlar ko‘pligini ko‘rsatmoqda.

“Real”

So‘nggi yillarda “Real” jarohatlardan eng ko‘p aziyat chekkan klub bo‘ldi. Ayniqsa, o‘tgan mavsumda bu jamoaga juda katta muammolar tug‘dirdi. Biroq kadrlar muammosiga qaramay, “qirollik klubi” Chempionlar Ligasida yarim finalga qadar yetib bordi. La Ligada esa so‘nggi turgacha chempionlik uchun kurashdi. YChLning 1/8 finalida “qaymoqranglilar” “Atalanta”ni, 1/4 da esa “Liverpul”ni mag‘lub etgandi. Ammo yarim finalda jamoa bo‘lajak chempion “Chelsi”ga yutqazdi. Shundan so‘ng Zinedin Zidan jamoani tark etdi va uning o‘rnini boshqa bir taniqli mutaxassis Karlo Anchelotti egalladi. Endi italiyalik mutaxassis “qirollik klubi”ni Ispaniya va Yevropada yana yetakchi o‘rinlarga qaytarishga harakat qilib ko‘radi.

“Real” shu maqsadda mavsumlar oralig‘ida himoya va yarim himoya chizig‘ini kuchaytirdi: David Alaba va Eduardo Kamavinga bilan shartnoma imzolandi. Bu mavjud tarkib uchun yaxshi qo‘shimcha bo‘la olishi dastlabki o‘yinlardanoq ko‘zga tashlandi. Yana shuni qo‘shimcha qilish kerak, Chempionlar Ligasi — “Real”ning musobaqasi hisoblanadi. To‘g‘ri, hozirda jamoada Krishtianu Ronaldu, Serxio Ramos kabi jamoani ortidan yetaklaydigan yulduzlar yo‘q, ammo yetarli darajada tajribali chempionlar hamda sovrinlarga tashna yosh iqtidorlar jamlangan. Ushbu uyg‘unlik “qaymoqranglilar”ning kuchli tomoni bo‘lib xizmat qilishi mumkin. Anchelotti bungacha ham “Real” bilan Chempionlar Ligasida g‘alaba qozongan. Nega endi buni takrorlamaslik kerak?