Samarqand viloyati Narpay tumani “O‘zbekiston” mahallasi Tanishka-2 qishlog‘ida iste’molga yaroqsiz bo‘lgan go‘sht mahsuloti tarqatilgani sababli kuydirgi kasalligi tarqalgani bo‘yicha “Daryo” tahririyatiga xabar kelib tushgandi. Veterinariya va chorvachilikni rivojlantirish davlat qo‘mitasi ushbu xabarlar o‘z tasdig‘ini topmaganini “Daryo”ga ma’lum qildi.
Eslatib o‘tamiz, xabarda ushbu kasallik bilan 6 nafar fuqaro kasallanib, shifoxonaga yotqizilgani ma’lum qilingandi. Samarqand viloyati sanitariya-epidemiologiya osoyishtalik va jamoat salomatligi boshqarmasi axborot xizmati Narpay tuman “O‘zbekiston” MFYga qarashli Tanishka qishlog‘ida yashovchi fuqarolarda A-22.0 (kuydirgi)ga gumon qilinib, 2021-yilning 17-sentabridan boshlab 5 nafar bemor ro‘yxatga olinganini “Daryo” so‘roviga asosan ma’lum qildi. Ular shu kuni Tanishka qishlog‘ida yashovchi qarindoshining so‘yilgan qoramol go‘shtidan iste’mol qilgan.
Viloyat SEO va JSB UXYUK laboratoriyasiga kasallikka gumon qilingan bemorlardan, qoramol so‘yilgan joydan, qoramol go‘shtidan namunalar olingan. 2021-yilning 27-sentabr kuni bemorlarning barchasidan olingan namunalar natijasi bakteriologik tekshiruvlarda manfiy natija aniqlangan.
Qo‘mitaning bildirishicha, mazkur holat maxsus shtab tomonidan batafsil o‘rganildi. O‘rganishlar davomida namunalar Hayvon kasalliklari va oziq-ovqat xavfsizligi davlat ilmiy markazi laboratoriyalarida chuqur tekshirilganida olingan namunalarda kasallik qo‘zg‘atuvchisi aniqlanmadi.
“Shu yilning o‘tgan davri mobaynida kasallikning eski tuproq o‘choqlaridan 3021 ta tuproq namunasi hamda 84,1 ming bosh qoramol va qo‘y terisida laboratoriya tekshiruvlari o‘tkazilganida kasallikka nisbatan musbat natija kuzatilmadi”, — deyiladi qo‘mita xabarida.
Kuydirgi — o‘tkir kechuvchi o‘ta xavfli infeksion kasallik bo‘lib, septitsemiya, og‘ir zaharlanish va karbunkulalar hosil qilish bilan kechadi. Barcha turdagi qishloq xo‘jalik, uy, yovvoyi hayvonlar kasallanadi hamda u odamlarga, asosan, hayvonlar orqali oson yuqadi. Kasallik qo‘zg‘atuvchisining tashqi muhitda 100 yilgacha saqlanib turishi inobatga olingan holda, kasallikning eski o‘choqlari davlat veterinariya xizmati tomonidan xavfsizligi bo‘yicha nazoratga olinadi.
Veterinariya va chorvachilikni rivojlantirish davlat qo‘mitasining qayd etishicha, O‘zbekistonda kuydirgi kasalligining chetdan kirib kelishi va tarqalishining oldini olish maqsadida kasallikka moyil qishloq xo‘jalik hayvonlarida hududiy davlat veterinariya xizmati tomonidan tizimli ravishda profilaktik vaksinatsiya ishlari guruh usulida kalendar reja asosida amalga oshirilmoqda.
Emlash ishlari har bir hududning tabiiy xususiyati va epizootik vaziyatidan kelib chiqib belgilanadi. Odatda emlash mavsumiy bo‘lib, bahor va kuz oylarida, majburiy emlash esa yilning istalgan vaqtida amalga oshiriladi.
2020-yilda jami 36,7 million bosh chorva hayvonlari (10,4 million bosh yirik va 22,8 million bosh mayda shoxli mollar hamda 522,0 ming bosh boshqa tur hayvonlar), 2021-yilda jami 26,4 million bosh chorva hayvonlari (10,1 million bosh yirik va 15,9 million boshdan ziyod mayda shoxli mollar hamda 380,6 ming bosh boshqa tur hayvonlar) kuydirgi kasalligiga qarshi profilaktik emlangan.
2021-yilning oxirigacha immunitetlik faolligi tugaydigan qariyb 10 million bosh chorva hayvoni kuydirgi kasalligiga qarshi profilaktik emlangan. Ya’ni immunitetlik faolligi to‘liq saqlab turilishi ta’minlangan. Davlat veterinariya xizmati zaxirasida 6,4 million doza emlama mavjud.
Izoh (0)