Самарқанд вилояти Нарпай тумани «Ўзбекистон» маҳалласи Танишка-2 қишлоғида истеъмолга яроқсиз бўлган гўшт маҳсулоти тарқатилгани сабабли куйдирги касаллиги тарқалгани бўйича «Дарё» таҳририятига хабар келиб тушганди. Ветеринария ва чорвачиликни ривожлантириш давлат қўмитаси ушбу хабарлар ўз тасдиғини топмаганини «Дарё»га маълум қилди.
Эслатиб ўтамиз, хабарда ушбу касаллик билан 6 нафар фуқаро касалланиб, шифохонага ётқизилгани маълум қилинганди. Самарқанд вилояти санитария-эпидемиология осойишталик ва жамоат саломатлиги бошқармаси ахборот хизмати Нарпай туман «Ўзбекистон» МФЙга қарашли Танишка қишлоғида яшовчи фуқароларда А-22.0 (куйдирги)га гумон қилиниб, 2021 йилнинг 17 сентябридан бошлаб 5 нафар бемор рўйхатга олинганини «Дарё» сўровига асосан маълум қилди. Улар шу куни Танишка қишлоғида яшовчи қариндошининг сўйилган қорамол гўштидан истеъмол қилган.
Вилоят СЕО ва ЖСБ УХЬЮК лабораториясига касалликка гумон қилинган беморлардан, қорамол сўйилган жойдан, қорамол гўштидан намуналар олинган. 2021 йилнинг 27 сентябрь куни беморларнинг барчасидан олинган намуналар натижаси бактериологик текширувларда манфий натижа аниқланган.
Қўмитанинг билдиришича, мазкур ҳолат махсус штаб томонидан батафсил ўрганилди. Ўрганишлар давомида намуналар Ҳайвон касалликлари ва озиқ-овқат хавфсизлиги давлат илмий маркази лабораторияларида чуқур текширилганида олинган намуналарда касаллик қўзғатувчиси аниқланмади.
«Шу йилнинг ўтган даври мобайнида касалликнинг эски тупроқ ўчоқларидан 3021 та тупроқ намунаси ҳамда 84,1 минг бош қорамол ва қўй терисида лаборатория текширувлари ўтказилганида касалликка нисбатан мусбат натижа кузатилмади», — дейилади қўмита хабарида.
Куйдирги — ўткир кечувчи ўта хавфли инфексион касаллик бўлиб, септицемия, оғир заҳарланиш ва карбункулалар ҳосил қилиш билан кечади. Барча турдаги қишлоқ хўжалик, уй, ёввойи ҳайвонлар касалланади ҳамда у одамларга, асосан, ҳайвонлар орқали осон юқади. Касаллик қўзғатувчисининг ташқи муҳитда 100 йилгача сақланиб туриши инобатга олинган ҳолда, касалликнинг эски ўчоқлари давлат ветеринария хизмати томонидан хавфсизлиги бўйича назоратга олинади.
Ветеринария ва чорвачиликни ривожлантириш давлат қўмитасининг қайд этишича, Ўзбекистонда куйдирги касаллигининг четдан кириб келиши ва тарқалишининг олдини олиш мақсадида касалликка мойил қишлоқ хўжалик ҳайвонларида ҳудудий давлат ветеринария хизмати томонидан тизимли равишда профилактик вакцинация ишлари гуруҳ усулида календарь режа асосида амалга оширилмоқда.
Эмлаш ишлари ҳар бир ҳудуднинг табиий хусусияти ва эпизоотик вазиятидан келиб чиқиб белгиланади. Одатда эмлаш мавсумий бўлиб, баҳор ва куз ойларида, мажбурий эмлаш эса йилнинг исталган вақтида амалга оширилади.
2020 йилда жами 36,7 миллион бош чорва ҳайвонлари (10,4 миллион бош йирик ва 22,8 миллион бош майда шохли моллар ҳамда 522,0 минг бош бошқа тур ҳайвонлар), 2021 йилда жами 26,4 миллион бош чорва ҳайвонлари (10,1 миллион бош йирик ва 15,9 миллион бошдан зиёд майда шохли моллар ҳамда 380,6 минг бош бошқа тур ҳайвонлар) куйдирги касаллигига қарши профилактик эмланган.
2021 йилнинг охиригача иммунитетлик фаоллиги тугайдиган қарийб 10 миллион бош чорва ҳайвони куйдирги касаллигига қарши профилактик эмланган. Яъни иммунитетлик фаоллиги тўлиқ сақлаб турилиши таъминланган. Давлат ветеринария хизмати захирасида 6,4 миллион доза эмлама мавжуд.
Изоҳ (0)