13-oktabr kuni “Transmashxolding” AJ tarkibiga kiruvchi “Metrovagonmash” tomonidan ishlab chiqarilgan 20 ta zamonaviy metro vagoni Toshkentga yuborildi. Shu bilan korxonaning Toshkent metropoliteni oldidagi kontrakt majburiyatlari yakunlandi, deb xabar beradi “O‘zbekiston temiryo‘llari” AJ matbuot xizmati.
Ma’lum qilinishicha, yuborilgan vagonlardan Toshkentda to‘rtta vagonli 5 ta metro poyezdi shakllantiriladi. Ushbu modifikatsiyadagi harakatlanuvchi tarkiblari yetkazilishi bilan Toshkent metropolitenida zamonaviy poyezdlar soni jami 60 vagonni, ya’ni 15 ta to‘rt vagonli poyezdni tashkil etadi.
Eslatib o‘tamiz, 2019-yilda metropolitenning 20 vagonidan iborat birinchi partiyasi Toshkentga yetib kelgandi. 2021-yilning avgust oyida esa “Metrovagonmash” AJ O‘zbekistonga yana 20 ta metro vagonini jo‘natgan.
Ma’lumot uchun, “Metrovagonmash” AJ va Toshkent metropoliteni 40 metro vagonini ishlab chiqarish bo‘yicha shartnomani 2021-yilning aprel oyida imzolagan. Moliyalashtirish manbalari Rossiyaning Rivojlanish va tashqi iqtisodiy aloqalar davlat banki va Rossiya eksport-import banki kreditlari hisoblanadi.
Keltiriladigan poyezdda vagonlar orqali erkin harakatlanish mumkin. Bosh vagonlarda nogironlar aravachasi uchun joylar mavjud. Har bir yo‘lovchilar bo‘linmasi bekatni qidirish, yo‘nalishni rejalashtirish va yo‘l vaqtini hisoblash uchun interaktiv qidirish qobiliyatiga ega sensor ekranli axborot monitorlari bilan jihozlangan.
Yo‘lovchi salonlari va haydovchi kabinalari videokuzatuv, konditsioner va havoni zararsizlantirish tizimlari bilan jihozlangan. Metro vagonlari va romlarining ishlash muddati 30 yil. Haydovchilar kabinasining old oynasi, bir qismi yer yuzida harakatlanadigan Toshkent metrosining o‘ziga xos xususiyatlarini inobatga olgan holda, qo‘lda sozlanishi mumkin bo‘lgan quyosh nurlaridan himoya qiluvchi tizim bilan ta’minlanadi.
Izoh (0)