Pokiston yadroviy dasturi rahbari, yadrochi fizik olim Abduqodir Xon 85 yoshida vafot etdi. Bu haqda olimning oilasiga tayanib, Ary News telekanali xabar berdi.
Uning o‘limga avvalroq koronavirus bilan kasallanishdan qolgan asoratlar sabab bo‘lgan. Davolash kursidan so‘ng bemorning ahvoli yaxshilangan, lekin 10-oktabrga o‘tar kechasi shifokorlar uni sun’iy nafas oldirish apparatiga ulashga majbur bo‘lgan.
Xon oilasi vakilining aniqlik kiritishicha, fizik KRL shifoxonasining jonlantirish bo‘limida vafot etgan. U Faysal masjidiga dafn qilinadi.
Pokistonda atom dasturining rivojlanishi 1956-yilda Atom energiyasi bo‘yicha komissiya tuzilishi bilan boshlangan. 1970-yillarning boshiga qadar yadroviy tadqiqotlar tinch xususiyatga ega edi.
Doktorlik darajasiga ega Abduqodir Xon ilgari Niderlandiyada uranni boyitish uchun gaz sentrifugalarini ishlab chiqaruvchi URENCO (Buyuk Britaniya, Germaniya, Niderlandiya) Yevropa konsorsiumida ishlagan, so‘ng 1975-yilda u Pokiston yadroviy dasturini rivojlantirishga qo‘shildi. Uning tadqiqotlari natijasida 1998-yil 28-mayda Pokistonning ilk yadroviy bombasi sinovdan o‘tkazildi.
2004-yilda Xon uning rahbarligi ostida yadro texnologiyalari xalqaro qora bozori faoliyat yuritganini tan oldi, shuningdek, yadroviy sirlarni Eron, Shimoliy Koreya va Liviyaga yetkazish bo‘yicha javobgarlikni o‘z zimmasiga oldi. O‘shanda olim Islomobodda uy qamog‘iga joylashtirilgan, keyinchalik esa u o‘z ko‘rsatmalaridan qaytgan.
Izoh (0)