АҚШ ҳарбий-денгиз кучларининг USS Connecticut ядровий сувости кемаси октябрь ойи бошида номаълум объект билан тўқнашган. Бу ҳақда Navy Times нашрига таяниб, Meduza хабар берди.
Воқеа Ҳинд—Тинч океани минтақасида содир бўлган. Тўқнашувдан кейин сувости кемаси юзага чиқишга мажбур бўлган ва сув устида Гуам оролидаги базага йўл олган.
Сувости кемаси айнан нима билан тўқнашгани текширув натижасида маълум бўлади. Шу билан бирга, АҚШ ҳарбий-денгиз қўмондонлигидаги манбаларга кўра, бу бирорта кема ёки бошқа сувости кемаси бўлгани эҳтимолдан йироқ.
Кеманинг бир нечта экипаж аъзолари енгил тан жароҳат олган. Ҳарбий-денгиз кучлари қўмондонлиги кеманинг ядро қувватига эга қурилма ва ички қисмига зарар етмаганини айтди.
Август ойида АҚШ Буюк Британия, Япония ва Австралия билан Жанубий Хитой денгизида қўшма машғулотларни бошлаганди. Бунга жавобан ХХР худди шундай машғулотлар ўтказди. Октябрь ойи бошида Хитой Тайван қирғоқларига 38 та жанговар самолёт юборди, бу тан олинмаган республиканинг ҳаво майдонига киритилган энг кўп жанговар самолёт эди.
Аввалроқ The Wall Street Journal америкалик расмийларга таяниб, АҚШ Тайванда махсус кучлар ва денгиз пиёдалари иштирокида бир йилдан буён яширинча машғулотлар ўтказаётгани ҳақида хабар берган. АҚШ ҳарбийлари «Хитой тажовузи» юз берган тақдирда унга қарши маҳаллий ҳарбий хизматчиларни тайёрламоқда.
Изоҳ (0)