Жорий йилнинг 29—30 сентябрь кунлари Тошкентда бўлиб ўтган «Иқтисодий ислоҳотлар сарҳисоби ва истиқболи» мавзусидаги 1-халқаро иқтисодий форумида йирик саноат корхонаси бўлган Олмалиқ кон-металлургия комбинати ва дунёнинг етакчи компания ҳамда банклари ўртасида бир қатор манфаатли шартномалар имзоланди.
Жумладан, ERP тизимини қўллаш концепциясини ишлаб чиқиш учун «KPMG Taks end Edvayzori» масъулияти чекланган ширкати билан шартнома имзоланди.
ERP тизимлари корхона ва ташкилотларнинг замонавий ривожланиш босқичида ахборот майдонида кенг қамровли ўрин эгаллайди.
Enterprise Resource Planning (ERP) — бу корхона ресурсларини режалаштириш, ишлаб чиқариш, сотиш, харидларни амалга ошириш ва ишлаб чиқариш, хизматлар соҳаларида мижозлар буюртмаларининг бажарилишини ҳисобга олиш учун зарур бўлган барча корхона ресурсларини самарали режалаштириш ва бошқариш методологияси.
«Олмалиқ КМК» АЖ фаолиятида ERP тизимини жорий этиш лойиҳаси «Рақамли Ўзбекистон — 2030» миллий стратегияси доирасида амалга оширилаётган «Рақамли ОКМК — 2030» концепциясига асосан ишлаб чиқилмоқда.
КПМГ ва ОКМК мутахассисларининг ҳамкорликдаги ишлари натижалари асосида ERP тизимини қўллаш концепцияси ишлаб чиқилади. Яни бир ҳамкорлик шартномаси Канаданинг HACh компанияси билан имзоланди. HACh бошқарув, лойиҳа ва ишлаб чиқиш бўйича халқаро консалтинг компанияси ҳисобланади.
Ҳамкорлик шартномаси мис саноати кластерини ташкил этиш ва ривожлантириш концепциясини ишлаб чиқишда мис маҳсулотлари ва кон машиналари ишлаб чиқариш бўйича тажриба алмашиш, илғор технологияларни жорий қилиш мақсадида тузилди.
Маълумот ўрнида шуни айтиш жоизки, жорий йилнинг 24 июнь куни «Кон-металлургия саноати ва унга боғлиқ соҳаларни ривожлантириш бўйича қўшимча чора-тадбирлар тўғрисида»ги президент қарорига мувофиқ мис саноати кластери ташкил этилиши белгиланиб, ушбу стратегик вазифани амалга ошириш чора-тадбирлари кўрсатиб ўтилди.
Мис саноати кластерини ташкил этиш мақсадида, рангли ва ноёб металлар учун геология-қидирув ишларини кенгайтириш бўйича 5 йиллик дастур ишлаб чиқилиши, соҳада лойиҳа ва муҳандислик хизматларини ривожлантириш учун етакчи халқаро компанияларни жалб этган ҳолда, замонавий лойиҳа институтини ташкил қилиш, республикамизда тоғ-кон ускуналари ва жиҳозларини ишлаб чиқаришни ҳамда уларга сервисни йўлга қўйиш каби вазифалари белгиланган.
Бугунги кунда ОКМК мамлакатимизда 90 фоиз мис ишлаб чиқаради. HACh компанияси билан имзоланган ҳамкорлик шартномасини ҳам президентнинг қарори ижроси сифатида баҳолаш мумкин.
Иқтисодий форумда комбинат ва бир қатор банклар ўртасида ҳам ҳамкорлик алоқалари йўлга қўйилди.
Хусусан, ОКМК ва Россия Федерациясининг «Москва кредит банки» ОАЖ ўртасида ҳамкорлик битими имзоланди.
Ушбу битим кон-металлургия саноатидаги бир қатор иқтисодий асосли лойиҳаларни молиялаштириш соҳасидаги ҳамкорликни кенгайтириш ва банк томонидан ОКМК инвестициявий лойиҳаларини молиялаштиришни ташкил этиш имкониятларини ўрганиш мақсадида тузилди.
Шунингдек, ОКМК ва Россия Федерациясининг «Совкомбанк» ОАЖ ўртасида кредит беришнинг дастлабки шартлари бўйича ҳужжат ҳам имзоланди.
Унга кўра, инвестиция лойиҳаларини молиялаштириш учун 200,0 миллион доллар миқдоридаги маблағ 2 йил имтиёзли давр билан 5 йил муддатга инвестициявий лойиҳалар, шу жумладан, «Ёшлик-1 конини ўзлаштириш» лойиҳаси, шунингдек, бошқа умумкорпоратив мақсадлар учун кредит беришнинг дастлабки шартлари белгиланди.
Хулоса қилиб айтадиган бўлсак, 2 кун давом этган иқтисодий форум комбинат ва ҳамкорлар учун самарали бўлди.
Маълумот шериклик ҳуқуқи асосида тайёрланди.
Изоҳ (0)