Samarqand viloyatida xavfsizlik kamarini taqmasdan kelgan haydovchiga ma’muriy bayonnoma rasmiylashtirgan YPX xodimini haqorat qilib, unga tosh otgan fuqaro javobgarlikka tortildi. Bu haqda viloyati IIB axborot xizmati xabar berdi.
Ma’lum qilinishicha, 15-sentabr kuni soat 12:00 larda Samarqand viloyati IIB YHXB xodimi tasdiqlangan dislokatsiyaga asosan Nurobod tumani “Jom” MFY hududidan o‘tuvchi Samarqand—Qarshi A-378 avtomobil yo‘lining 32-kilometrida xizmat faoliyatini olib borayotgan vaqtida Kia Bongo avtomobilini to‘xtatib, tekshirgan. Haydovchi xavfsizlik kamarini taqmasdan harakatlangani sabab unga ma’muriy bayonnoma rasmiylashtirilgan.
18-sentabr kuni esa ushbu YPX xodimi tumanning “Oqsoy” MFY hududidan o‘tuvchi avtomobil yo‘lida xizmat olib borayotganida haydovchining otasi kelib, “Nima sababdan o‘g‘limga ma’muriy bayonnoma tuzasan?” deya turli so‘zlar bilan haqorat qilgan.
Shuningdek, u YPX xodimiga tosh otib quvlagan hamda Past Darg‘om tumani “Charxun” qo‘rg‘onida joylashgan YPX maskaniga qadar ortidan ta’qib qilib, xodimning xizmat mashinasini qisib to‘xtatgan. Mazkur transport vositasining hujjatlari tekshirilganda haydovchi biror-bir hujjatni taqdim eta olmagan. Shu sababli haydovchiga ma’muriy bayonnoma rasmiylashtirilib, avtomashina jarima maydoniga qo‘yilgan.
YPX xodimining xizmat faoliyatiga xalaqit bergan va uni haqorat qilgan haydovchining otasi narkolog shifokor ko‘rigidan o‘tkazilganida uning mast ekani aniqlangan. Holat yuzasidan to‘plangan hujjatlar jinoyat ishlari bo‘yicha Past Darg‘om sudida ko‘rib chiqilgan. Sudning 21-sentabrdagi qarori bilan ushbu fuqaro ma’muriy huquqbuzarlikni sodir etganlikda aybli deb topilib, 15 sutka ma’muriy qamoq jazosi tayinlangan.
Avvalroq Surxondaryoda YPX xodimini Lacetti kapotida sudrab ketgan haydovchi qamoqqa olingani, Xorazmda haydovchi bilan janjallashgan YPX xodimlari jazolangani, Samarqandda YPX inspektorining to‘xtash ishorasiga bo‘ysunmagan Damas haydovchisi ushlangani to‘g‘risida xabar berilgandi.
Izoh (0)