“Olmaliq KMK” AJ tomonidan O‘zbekiston Milliy matbuot markazida OAV vakillari uchun “Olmaliq kon-metallurgiya kombinatida yoshlar siyosati bo‘yicha amalga oshirilayotgan ishlar” mavzusida matbuot anjumani o‘tkazildi.
Tadbir “Olmaliq KMK” AJ boshqaruv raisining axborot siyosati masalalari bo‘yicha maslahatchisi Umida Qarshiboyeva tomonidan ochib berildi.
Barchamizga ma’lum, O‘zbekiston Respublikasi Prezidenti tashabbusi bilan 2017-yilda mamlakatimizda O‘zbekiston Respublikasi Yoshlar ittifoqi tashkil etilgan. Ta’kidlab o‘tish lozimki, 2018-yilda sanoat korxonalari orasida birinchilardan bo‘lib, Olmaliq kon-metallurgiya kombinatida Yoshlar ittifoqi yetakchilar kengashi tashkil etilgan.
Ma’lum bo‘lishicha, hozirgi kunda Olmaliq kon-metallurgiya kombinatida 38 mingdan ortiq ishchi xodimlar mehnat qilishmoqda, ularning 36 foizini (13 672 nafar) yoshlar tashkil etadi. Shuningdek, 150 dan ortiq yosh mutaxassislar rahbarlik lavozimlariga tayinlangan. Joriy yil davomida oliy o‘quv yurtlaridan 27 nafar yosh mutaxassislar kombinatga ishga qabul qilingan. 2021-yilning oxiriga qadar oliy o‘quv yurtlarni tamomlagan 70 dan ortiq yoshlarni ishga qabul qilish rejalashtirilgan.
Matbuot anjumani davomida Olmaliq kon-metallurgiya kombinati rahbariyati tomonidan yoshlar ittifoqining faoliyatini yanada qo‘llab quvvatlash maqsadida kombinatning 18 ta tarkibiy bo‘linmalarida rahbarning yoshlar masalalari bo‘yicha yordamchisi — Yoshlar ittifoqi raisi joriy etilganligi, ushbu lavozimlar birinchi o‘rinbosar darajasiga tenglashtirilganligi Olmaliq KMK boshqaruv raisining yoshlar masalalari bo‘yicha maslahatchisi, Yoshlar ittifoqi raisi Abror Kamilov tomonidan ma’lum qilindi.
E’tiborli jihati, Olmaliq kon-metallurgiya kombinatida yoshlarni qo‘llab-quvvatlash va ularning kasbiy ko‘nikmalarini rivojlantirish maqsadida bir qator muhim ishlar amalga oshirilmoqda. Jumladan, Yoshlar ittifoqi yetakchilar kengashi qoshida yosh mutaxassislar texnik kengashi hamda “Yosh metallurglar”, “Yosh boyituvchilar”, “Yosh energetiklar”, “Yosh mexaniklar” klublari faoliyati tashkil etilgan. Hozirgi kunda, klublar a’zolari tomonidan ilgari surilgan 10 dan ortiq innovatsion takliflar sinovlardan muvaffaqiyatli o‘tib, amaliyotga tatbiq etilgan. Shuningdek, rahbar kadrlar zaxirasini shakllantirish va rahbarlik lavozimlariga yosh mutaxassislarni tayinlash maqsadida “Yosh rahbar” ko‘rik-tanlovi o‘tkazilgan. Sinovlardan muvaffaqiyatli o‘tgan yosh mutaxassislar rahbarlik lavozimlariga tavsiya etilgan.
Tadbir davomida yoshlar ijtimoiy qo‘llab-quvvatlash va munosib mehnat sharoitlarini yaratish masalalariga ham alohida to‘xtalib o‘tildi. Kombinatimiz yoshlarini ijtimoiy jihatdan qo‘llab-quvvatlash maqsadida o‘nta ko‘p qavatli uylar kombinatimizning yuzlab yoshlariga imtiyozli ravishda topshirildi, deb ma’lumot berdi “Olmaliq KMK” AJ boshqaruv raisining xodimlar bilan ishlash va ijtimoiy masalalar bo‘yicha o‘rinbosari v.b. Behzod Salimov.
Matbuot anjumani tashkilotchilari tomonidan joriy yilda kombinat Aholi bandligiga ko‘maklashish markazi Toshkent viloyati boshqarmasi bilan hamkorlikda band bo‘lmagan yoshlar va xotin-qizlarni ishchi kasbga o‘qitish bo‘yicha qisqa muddatli o‘quv kurslari tashkil etgani ta’kidlandi. Hududdagi “Yoshlar daftari”ga kiritilgan 300 ga yaqin fuqarolar 28 turdagi kasblarga o‘qitilib, viloyatda mavjud sanoat korxonalarga ishga jalb qilingan.
Kombinatning yil dasturi doirasidagi yana bir xayrli ishlaridan biri ishsiz yoshlar va xotin-qizlarga dehqonchilik qilishlari uchun 50 sotixdan yuqori likvidli ekin ekish maqsadida jami 250 gektar yer maydoni ajratilganidir. Yoshlar bu imkoniyatlardan samarali va unumli foydalanib, ayni vaqtda hosil yetilib, yig‘im-terim ishlari boshlab yuborilgan.
Olmaliq kon-metallurgiya kombinati mas’ul xodimlari tomonidan kombinatga ishga qabul qilish shartlari va bugungi kunda ehtiyoji baland bo‘lgan kasblari hakida ham ma’lumotlar berildi.
Onlayn tarzda o‘tgan tadbirda OAVlari vakillari va blogerlar o‘zlarini qiziqtirgan savollariga to‘liq javob olishdi.
Ma’lumot sheriklik huquqi asosida tayyorlandi.
Izoh (0)